Nënkryetari i LDK-së, Lutfi Haziri, ka thënë se angazhimi kryesor i partisë në këtë periudhë duhet të jetë zgjidhja e presidentit të Republikës së Kosovës, duke theksuar se kjo duhet të mbetet prioriteti kryesor i LDK-së.
Duke folur në emisionin “Politiko” në Kanal 10, Haziri ka deklaruar se LDK-ja nuk duhet të shpërqendrohet nga kjo çështje dhe se fokusi i partisë duhet të jetë në përmbushjen e kësaj detyre.
“E para dhe më e rëndësishmja, angazhimi i LDK-së është dhe duhet të mbetet vetëm në zgjidhjen e presidentit të Republikës. Vetëm kjo është detyra kryesore që ne po e kalojmë sot”, ka thënë Haziri.
Haziri është ndalur edhe te zhvillimet e fundit brenda LDK-së, përfshirë debatet rreth kryetarit të partisë, Lumir Abdixhiku, dhe delegatëve të LDK-së.
Ai ka theksuar se brenda LDK-së nuk duhet të ketë kontroll të mendimit politik dhe se dallimet në qëndrime duhet të respektohen si pjesë e demokracisë së brendshme të partisë.
“Ne në LDK nuk mendojmë me pas polici të mendimit. Në mendimin politik e respektojmë dhe e vlerësojmë dallimin. Mundesh me pa vet”, është shprehur Haziri.
Sipas tij, debatet dhe dallimet brenda partisë janë pjesë e proceseve demokratike dhe secili anëtar duhet të ketë hapësirë për të shprehur qëndrimin e tij politik.
Haziri ka thënë gjithashtu se LDK-ja tashmë ka kaluar nëpër procese të brendshme ku janë diskutuar dhe votuar çështjet e ngritura, ndërsa rezultatet e këtyre proceseve janë pranuar nga strukturat e partisë.
Deklaratat e Hazirit vijnë në një periudhë kur LDK-ja po përballet me debate të brendshme, ndërsa në planin institucional zgjedhja e presidentit të Republikës së Kosovës mbetet një prej çështjeve kryesore politike. Burimi: Tv Kanal 10 emisioni Politico.
