Vetëm pak orë pas skadimit të afatit për zgjedhjen e presidentit, kryeministri Albin Kurti ka dalë me një propozim të ri për kreun e PDK-së, Bedri Hamza.
Në një konferencë për media të mbajtur në orën 22:00, Kurti ka propozuar profesoreshën Justina Pulën për presidente të Kosovës, duke i bërë thirrje PDK-së që të rikthehet në Kuvend dhe të marrë pjesë në votim.
Kurti ka thënë se Lëvizja Vetëvendosje është e gatshme që fillimisht të votojë ndryshimet në Ligjin për Dhomat e Specializuara, nëse deputetët e PDK-së zotohen se do të marrin pjesë në votimin për presidentin.
“Kryetari i PDK-së le të dalë sonte pas meje menjëherë dhe të thotë se 22 deputetët e PDK-së zotohen se marrin pjesë me votë në zgjedhjen e presidentit. Ne po e votojmë projektligjin paraprakisht. Dhe mandej votimi për presidente, profesoresha Justina Pula, kryetare e Akademisë së Shkencave”, ka deklaruar Kurti.
Ai ka përsëritur se deputetët e tij janë të gatshëm të votojnë paraprakisht projektligjin për ndryshimin e Ligjit për Dhomat e Specializuara, nëse PDK-ja garanton pjesëmarrjen në votimin për presidente.
Propozimi për Justina Pulën vjen pas propozimeve të mëparshme të Kurtit për president, ndërsa afati për zgjedhjen e presidentit tashmë ka skaduar.
