Kryetari i Lidhjes Demokratike të Kosovës (LDK), Lumir Abdixhiku, ka reaguar pas zhvillimeve lidhur me Ligjin për Dhomat e Specializuara dhe Zyrën e Prokurorit të Specializuar, duke kritikuar ata që, sipas tij, e akuzuan LDK-në për qëndrimin e saj ndaj këtij ligji.
“Ligjin e kthyet. Por baltën që hodhët mbi LDK-në, ku do ta lini?”, ka shkruar Abdixhiku në një postim në Facebook.
Ai ka thënë se LDK-ja ishte fyer dhe ishte cilësuar si tradhtare, madje, sipas tij, ishte paraqitur si kundërshtare e Ushtrisë Çlirimtare të Kosovës (UÇK).
Abdixhiku ka kritikuar gjithashtu vendosjen e emrave të përfaqësuesve të LDK-së përkrah atyre të Listës Serbe, duke theksuar se partia e tij kishte shprehur qëndrimin e vet për ligjin, pavarësisht reagimeve që pasuan.
“I vendosët edhe emrat tanë përkrah atyre të Listës Serbe, sepse thamë atë që nuk donit ta dëgjonit; të vërtetën. Ky ligj nuk kishte dhe s’do të ketë asnjë efekt juridik!”, ka deklaruar ai.
Abdixhiku: LDK-ja e mbajti qëndrimin e vet
Kreu i LDK-së ka theksuar se partia e tij nuk është tërhequr nga qëndrimi i saj, ndonëse, sipas tij, ishte e vetëdijshme për sulmet që do të pasonin.
“Sepse përgjegjësia ndaj Republikës na obligon ta themi atë që besojmë se është e drejtë, edhe kur është më e lehtë t’i bashkohesh zhurmës”, ka shkruar Abdixhiku.
Ai u është drejtuar edhe mbështetësve të LDK-së, duke u bërë thirrje që të qëndrojnë krenarë për qëndrimet e partisë.
Sipas tij, qëndrimet e LDK-së nuk përcaktohen nga reagimet e momentit, por nga bindjet për Republikën.
Në fund të reagimit, Abdixhiku ka theksuar rëndësinë e luftës së UÇK-së, duke thënë se ajo duhet të mbrohet përmes punës dhe arsyes.
“Lufta e UÇK-së është e shenjtë. Ajo mbrohet me punë e me mend. Jo kështu!”, ka përfunduar ai.
