Përpjekjet diplomatike për t’i dhënë fund luftës mes Rusisë dhe Ukrainës po vazhdojnë, ndërsa presidenti amerikan Donald Trump ka deklaruar se po shënohet përparim drejt arritjes së një marrëveshjeje mes dy vendeve.
Trump është shprehur optimist për mundësinë e një dakordësie, duke pretenduar se për herë të parë si Moska, ashtu edhe Kievi po tregojnë gatishmëri për të arritur një marrëveshje.
Ai ka bërë të ditur se ka zhvilluar disa telefonata lidhur me këtë çështje dhe se ka planifikuar takime të tjera për të hënën dhe të martën.
“Rusia dhe Ukraina, për herë të parë, duan të arrijnë një marrëveshje. Do të jetë një marrëveshje shumë e madhe dhe do të përfshijë edhe Evropën”, deklaroi presidenti amerikan.
Zelensky: Jemi të gatshëm të takohemi me Putinin, por jo në Moskë
Ndërkohë, presidenti ukrainas Volodymyr Zelensky ka konfirmuar gatishmërinë e Ukrainës për t’u ulur në tryezën e negociatave me presidentin rus Vladimir Putin.
Në një intervistë për CNN, Zelensky ka bërë të qartë se është i gatshëm të takohet me liderin rus në një vend tjetër, por ka përjashtuar Moskën si vend të mundshëm për takimin.
“Ne jemi të gatshëm të takohemi me të në çdo vend, por jo në Moskë”, është shprehur Zelensky.
Ai ka theksuar se Ukraina ka nevojë për sisteme të mbrojtjes ajrore dhe raketa për t’u përballur me sulmet ruse dhe për të vazhduar rezistencën, derisa Trump të arrijë ta bindë Putinin që të negociojë.
Zelensky kundërshton një marrëveshje që cenon sovranitetin e Ukrainës
Gjatë intervistës, presidenti ukrainas ka ngritur gjithashtu shqetësime lidhur me marrëveshjen e sigurisë që administrata Trump pritet t’ia propozojë Ukrainës.
Sipas Zelenskyt, çdo marrëveshje duhet të garantojë sovranitetin dhe integritetin territorial të Ukrainës. Ai ka paralajmëruar gjithashtu kundër mundësisë që Evropa dhe Ukraina të përjashtohen nga negociatat apo të ndahen përmes marrëveshjeve të drejtpërdrejta me Rusinë.
“Ne jemi të gjithë në Evropë. Nuk duam një Jaltë 2.0 dhe nuk duam të ndahemi nga Rusia”, ka deklaruar Zelensky.
Ai e ka cilësuar potencialisht të rrezikshme marrëveshjen e sigurisë të përmendur nga administrata amerikane, duke insistuar se Ukraina dhe vendet evropiane duhet të jenë pjesë e çdo procesi që përcakton të ardhmen e sigurisë së kontinentit.
Për momentin, deklaratat e Trumpit dhe Zelenskyt sinjalizojnë gatishmëri për vazhdimin e përpjekjeve diplomatike, por ende nuk është bërë e ditur nëse këto kontakte do të çojnë në një takim të drejtpërdrejtë mes liderëve rusë dhe ukrainas apo në një marrëveshje konkrete për përfundimin e luftës.
