Kryetari i Lidhja Demokratike e Kosovës, Lumir Abdixhiku, ka reaguar ashpër pas kërkesave të degëve të Pejës dhe Lipjanit për dorëheqjen e tij, duke i cilësuar zhvillimet si pjesë e një projekti sabotues kundër partisë.
Përmes një postimi publik, Abdixhiku tha se do të kishte qenë më korrekte që kërkesa për dorëheqje t’i parashtrohej drejtpërdrejt dhe jo përmes mediave.
“I falënderoj për sugjerimet e kërkesat e koordinuara të dy kryetarëve të degëve, të Pejës e Lipjanit, të dhëna nëpërmjet mediave për dorëheqjen time. Do të kishte qenë më korrekte që këtë ta bënin ballë për ballë”, ka shkruar ai.
Abdixhiku pranoi se rezultati zgjedhor në këto dy degë nuk është i kënaqshëm, por theksoi se fakti që LDK ka dalë forcë e tretë në komuna ku vetë qeveris, sipas tij, tregon për një sabotim të brendshëm.
“Në komuna ku kemi qeverisje, të dalim të tretët tregon vetëm dozën e një sabotimi të thellë dhe të një projekti që nuk është i LDK-së”, deklaroi ai.
Sa i përket kërkesës për dorëheqjen e tij, Abdixhiku tha se kjo çështje është trajtuar tashmë në Kuvendin e partisë më 31 janar dhe se anëtarësia ka folur qartë.
Në të njëjtën kohë, ai kërkoi dorëheqjen morale të dy kryetarëve të degëve që kërkuan largimin e tij.
“Për performancën e dobët në këto dy degë, rezultatin më të ulët ndër vite, pres dorëheqjet morale të dy kryetarëve në fjalë. I pranoj menjëherë”, u shpreh kreu i LDK-së.
Abdixhiku paralajmëroi se nuk do të lejojë, siç tha ai, projekte që synojnë ndarjen dhe dobësimin e LDK-së.
Sipas tij, tentativa të tilla kanë dështuar më 31 janar, kanë dështuar në zgjedhje dhe do të dështojnë sërish.
“LDK nuk është konfederatë e interesave lokale dhe as platformë e karrierave individuale. LDK mbetet parti nacionale”, theksoi Abdixhiku.
Në fund, ai u bëri thirrje anëtarëve të partisë që të ruajnë qetësinë dhe unitetin, ndërsa shprehu keqardhje për, sipas tij, dëmtimet e vazhdueshme nga brenda.
“Si nuk u ngopën kurrë?!”, përfundoi reagimin e tij.
