Asociacioni i Komunave të Kosovës ka dorëzuar në Gjykata Kushtetuese e Republikës së Kosovës kërkesën për vlerësimin e kushtetutshmërisë së Rregullores Nr. 07/2025 për Procedurën e Pranimit në Shërbimin Civil.
Pas dorëzimit të kërkesës, kryetari i Komunës së Rahovecit, Smajl Latifi, deklaroi se rregullorja paraqet ndërhyrje të nivelit qendror në kompetencat e pushtetit lokal dhe cenon autonominë komunale.
“Në cilësi të palës së autorizuar sipas nenit 113, paragrafi 4 të Kushtetutës së Republikës së Kosovës, posa dorëzuam në Gjykatën Kushtetuese kërkesën për vlerësim të kushtetutshmërisë së Rregullores nr. 07/2025 për procedurën e pranimit në shërbimin civil”, tha Latifi.
Sipas tij, komunat nuk do të lejojnë cenimin e autonomisë lokale, e cila garantohet me Kushtetutë, me Ligjin për Vetëqeverisje Lokale dhe me aktet ndërkombëtare.
Latifi theksoi se rregullorja parasheh centralizim të procesit të rekrutimit në shërbimin civil, duke ia kaluar procedurat Departamentit për Menaxhimin e Zyrtarëve Publikë në kuadër të Ministria e Punëve të Brendshme e Kosovës.
“Rregullorja për neve është kundërkushtetuese sepse parasheh një sistem të centralizuar të rekrutimit për shërbimin civil”, u shpreh ai.
Ai shtoi se pret që Gjykata Kushtetuese të konfirmojë, sipas tij, shkeljen e Kushtetutës, Kartës Evropiane për Vetëqeverisje Lokale dhe standardeve të Komisionit të Venecias nga ana e Qeverisë së Kosovës.
Sipas Latifit, kjo qasje bie ndesh me frymën e decentralizimit dhe krijon marrëdhënie të paqëndrueshme ndërmjet pushtetit lokal dhe atij qendror.
