Prokuroria Speciale dhe Policia e Kosovës kanë zhvilluar një operacion në pesë lokacione në Prishtinë, Fushë Kosovë dhe Ferizaj, në kuadër të një hetimi ndërkombëtar për mashtrime përmes platformave të rreme të investimeve dhe qendrave të thirrjeve. Tre persona janë arrestuar nën dyshimin për përfshirje në veprimtari të organizuar kriminale.
Sipas njoftimit të Sistemit Prokurorial, operacioni është zhvilluar më 3 nëntor 2026, me urdhër të Prokurorisë Speciale të Republikës së Kosovës.
Në aksion kanë marrë pjesë hetuesit e Drejtorisë për Hetimin e Krimeve Ekonomike dhe asaj për Hetimin e Krimeve Kibernetike në Policinë e Kosovës, të cilët kanë kryer kontrolle në pesë lokacione në komunat e Prishtinës, Fushë Kosovës dhe Ferizajt.
Si rezultat i operacionit janë arrestuar tre persona me inicialet M.P., I.H. dhe F.Z.
Ata dyshohen për veprat penale të pjesëmarrjes ose organizimit të grupit kriminal të organizuar, mashtrimit, hyrjes së paautorizuar kompjuterike dhe mashtrimit kompjuterik.
Operacioni u zhvillua në gjashtë shtete
Aksioni në Kosovë është pjesë e një operacioni ndërkombëtar, në kuadër të të cilit kontrolle janë zhvilluar edhe në Shqipëri, Qipro, Izrael, Finlandë dhe Maqedoninë e Veriut.
Hetimi lidhet me dyshimet për veprimtari kriminale përmes qendrave të thirrjeve dhe platformave të rreme të investimeve, të cilat dyshohet se janë përdorur për mashtrimin e qytetarëve.
Prokuroria Speciale nuk ka dhënë detaje të tjera lidhur me numrin e personave të dëmtuar apo vlerën e mundshme të dëmit financiar.
Të arrestuarit dyshohen për veprat e përmendura dhe vlejnë parimet e prezumimit të pafajësisë deri në një vendim përfundimtar të gjykatës.