Pesë persona të dyshuar për krime lufte janë arrestuar sot në Komunën e Skenderajt, pas një aksioni të zhvilluar nga hetuesit policorë të Sektorit për Hetimin e Krimeve të Luftës.
Sipas njoftimit të Sistemit Prokurorial të Kosovës, arrestimet janë kryer me urdhër të Prokurorisë Speciale të Republikës së Kosovës, në kuadër të hetimeve për veprat penale që lidhen me krimet e luftës.
Autoritetet bëjnë të ditur se aksioni është realizuar nga njësitë përkatëse policore, ndërsa personat e arrestuar dyshohen për përfshirje në krime të kryera gjatë periudhës së luftës në Kosovë.
Nga Prokuroria Speciale është bërë e ditur se për detaje të tjera lidhur me rastin dhe identitetin e të arrestuarve, publiku do të njoftohet në vijim përmes një komunikate të përbashkët me Policinë e Kosovës.
Institucionet e drejtësisë kanë theksuar se hetimet për krimet e luftës mbeten prioritet dhe do të vazhdojnë deri në zbardhjen e plotë të rasteve dhe vendosjen e drejtësisë për viktimat.
