Policia e Kosovës ka arrestuar në Prishtinë një person të kërkuar përmes INTERPOL-it me urdhër arrest ndërkombëtar të lëshuar nga Republika Federale e Gjermanisë.
Sipas njoftimit të Policisë së Kosovës, Drejtoria për Bashkëpunim Ndërkombëtar Policor, përkatësisht Sektori FAST, pas pranimit të informatave operative, ka identifikuar dhe arrestuar më 13 korrik 2026 personin me inicialet F.R., shtetas gjerman.
I arrestuari dyshohet se kërkohej nga autoritetet gjermane për veprën penale “Trafikim i paligjshëm i substancave narkotike”, vepër e dënueshme sipas Kodit Penal të Gjermanisë.
Pas arrestimit, me vendim të prokurorit kujdestar të Prokurorisë Themelore, personit i është caktuar masa e ndalimit prej 48 orësh.
Rasti do të vazhdojë të trajtohet nga Drejtoria për Bashkëpunim Ndërkombëtar Policor – ILECU, në koordinim me autoritetet kompetente të drejtësisë dhe institucionet përkatëse ndërkombëtare.
Policia e Kosovës ka theksuar se mbetet e përkushtuar në forcimin e bashkëpunimit ndërkombëtar policor dhe zbatimin e urdhër-arresteve ndërkombëtare në luftën kundër krimit dhe për forcimin e sundimit të ligjit.
