FC Barcelona është shpallur kampione e La Liga për herë të 29-të në histori, pasi siguroi matematikisht titullin me fitore ndaj rivalit të madh Real Madrid CF në “El Clasico”.
Skuadra katalanase po udhëheq 2-0 në përballjen e zhvilluar në Barcelonë, duke vulosur sezonin me një triumf ndaj rivalit historik.
Rashford dhe Ferran Torres ndezin festën katalanase
Marcus Rashford hapi serinë e golave në minutën e 9-të me një goditje dënimi, ndërsa Ferran Torres dyfishoi epërsinë në minutën e 18-të pas një asistimi spektakolar me thembër nga Dani Olmo.
Barcelona dominoi pjesën më të madhe të lojës, ndërsa portieri Thibaut Courtois shmangu disa gola të tjerë me pritje vendimtare.
Nga ana tjetër, Real Madridi pati raste me Vinícius Júnior, Jude Bellingham dhe Aurélien Tchouaméni, por pa sukses.
Titull me shije speciale
Ky titull konsiderohet veçanërisht i rëndësishëm për Barcelonën, pasi u sigurua zyrtarisht në ndeshjen më të madhe të futbollit spanjoll, kundër rivalit historik nga Madridi.
Nën drejtimin e trajnerit Hansi Flick, Barcelona ka zhvilluar një sezon të fortë dhe rikthehet fuqishëm në majën e futbollit spanjoll.
