Një investigim i gazetarit Mykhailo Tkach ka rikthyer në vëmendje skandalin e ashtuquajtur “Batalioni i Monakos”, një grup prej dhjetëra oligarkësh, deputetësh dhe biznesmenësh ukrainas që u larguan nga Ukraine pas nisjes së luftës dhe u strehuan në zonat luksoze të France dhe Monaco.
Në verën e vitit 2022, gazetari i Ukrainska Pravda udhëtoi në jug të Francës, ku dokumentoi me kamera dhe dron vila luksoze, jahte, makina superluksoze dhe figura të njohura ukrainase që jetonin larg frontit të luftës.
Termi “Batalioni i Monakos” u përdor për të përshkruar 84 deputetë dhe oligarkë, të cilët, ndërsa vendi i tyre përballej me bombardimet ruse, zgjodhën të largoheshin drejt Monte Carlo, Nice dhe rivierës franceze.
Skandali shkaktoi zemërim të madh në Ukrainë, duke nxjerrë sërish në pah çështjet e korrupsionit të elitave politike dhe pabarazisë sociale, në një kohë kur mijëra qytetarë ndodheshin në vijën e frontit.
Mes emrave më të njohur të përfshirë në listë përmenden:
- Ihor Abramovich, deputet ukrainas
- Kostyantyn Zhevago, një nga njerëzit më të pasur në Ukrainë
- Ihor Surkis, president i klubit Dynamo Kyiv
- Vadim Ermolaev, biznesmen i njohur ukrainas
Pamjet e publikuara tregonin jahte luksoze, përfshirë jahtin “Z”, makina si Bentley Flying Spur dhe Mercedes-Maybach, si dhe ditë të qeta mes kazinove, plazheve dhe shopping-ut.
Sipas raportimeve, 82 anëtarë të këtij grupi dyshohet se kanë shkelur ligjin ushtarak ukrainas, i cili ndalon meshkujt nga 18 deri në 60 vjeç të largohen nga vendi gjatë gjendjes së luftës, nëse janë të aftë për shërbim ushtarak.
Për deputetët, çështja rëndohet edhe më shumë për shkak të mungesës së tyre në punimet e Verkhovna Rada, parlamentit ukrainas, gjatë një periudhe kritike për vendin.
Editorialisti i Kyiv Post, George Woloshyn, komentoi se këta individë po presin fundin e luftës për të parë se nga do të anojë fitorja.
Sipas tij, nëse Ukraina fiton, ata mund të kthehen për të rimarrë ndikimin dhe pasurinë e tyre; nëse fiton Russia, ata tashmë kanë mjaftueshëm pasuri për të jetuar rehat jashtë vendit.
Megjithëse skandali shkaktoi reagim të fortë publik, masat ndaj oligarkëve kanë qenë të kufizuara, kryesisht me kontrolle financiare dhe kufizime administrative për udhëtimet.