Komisioni Evropian ka nisur përpjekje të reja për të shmangur vonesat e gjata në aeroportet e Bashkimit Evropian, të shkaktuara nga zbatimi i Sistemit të Hyrjes/Daljes (EES), i cili kërkon regjistrimin biometrik të udhëtarëve nga vendet jashtë zonës Shengen.
Në një letër drejtuar aeroporteve dhe kompanive ajrore, komisioneri për Migracionin, Magnus Brunner, theksoi se sistemi synon të rrisë sigurinë kufitare pa krijuar pengesa të panevojshme për vizitorët.
Sistemi EES, i cili po zbatohet gradualisht që nga tetori i vitit 2025, zëvendëson vulosjen tradicionale të pasaportave me regjistrimin e fotografisë së fytyrës dhe gjurmëve të gishtërinjve për shtetasit e vendeve jashtë BE-së që hyjnë në zonën Shengen për qëndrime afatshkurtra.
Megjithatë, organizatat që përfaqësojnë linjat ajrore kanë ngritur shqetësime për radhët e gjata dhe vonesat në disa aeroporte evropiane, duke argumentuar se problemet teknike dhe mungesa e personelit kanë ngadalësuar ndjeshëm procedurat kufitare.
Edhe presidentja e Komisioni Evropian, Ursula von der Leyen, pranoi se sistemi po përballet me vështirësi teknike që kërkojnë ndërhyrje dhe përmirësime.
Sipas Brunner, në shumicën e shteteve anëtare sistemi funksionon normalisht, por në disa pika kufitare pritjet janë zgjatur për shkak të mungesës së stafit dhe infrastrukturës së pamjaftueshme.
Për të shmangur bllokimet gjatë sezonit veror, Komisioni Evropian do të bashkëpunojë ngushtë me qeveritë e vendeve anëtare për të përmirësuar funksionimin e sistemit. Aktualisht, shtetet kanë mundësi të pezullojnë përkohësisht mbledhjen e të dhënave biometrike në raste të veçanta, për të lehtësuar fluksin e udhëtarëve.
Sipas të dhënave të publikuara nga Komisioni Evropian, që nga tetori 2025 sistemi EES ka ndaluar hyrjen në BE të 43.728 personave për shkelje të rregullave kufitare. Prej tyre, 16.383 nuk kishin arsye të vlefshme për hyrje, 8.739 kishin tejkaluar afatin e lejuar të qëndrimit, ndërsa mbi 400 persona u kapën duke përdorur dokumente të falsifikuara.
Që nga 10 prilli 2026, Sistemi i Hyrjes/Daljes është bërë i detyrueshëm për të gjithë shtetasit e vendeve jashtë Bashkimit Evropian që hyjnë në zonën Shengen për vizita afatshkurtra.
