Komisionarja për Zgjerim e Bashkimit Evropian, Marta Kos, ka deklaruar se ka zhvillime “inkurajuese” sa i përket qëndrimit të pesë shteteve anëtare të BE-së që ende nuk e njohin pavarësinë e Kosova.
Gjatë një mbledhjeje të Komitetit për Punë të Jashtme në Parlamentin Evropian, ajo u pyet nga raportuesi për Kosovën, Riho Terras, lidhur me angazhimin e Komisionit Evropian për këtë çështje.
“Sa i përket pesë shteteve mosnjohëse, unë ndjek çfarë po ndodh dhe zhvillimi është inkurajues,” tha Kos, pa dhënë detaje shtesë.
Pesë vendet e BE-së që ende nuk e kanë njohur Kosovën janë Greqia, Spanja, Rumania, Sllovakia dhe Qiproja. Mosnjohja nga këto shtete konsiderohet një nga pengesat kryesore në rrugën evropiane të Kosovës.
Kosova ka aplikuar për anëtarësim në BE në dhjetor të vitit 2022, por procesi ende nuk ka hyrë në fazën formale të shqyrtimit nga Këshilli i BE-së.
Në të njëjtën mbledhje, Kos u pyet edhe për mungesën e vizitës së saj në Kosovë që nga marrja e mandatit. Ajo sqaroi se, për shkak të situatës politike, vizita është shtyrë, por theksoi se është në kontakt të vazhdueshëm me autoritetet në Prishtinë.
Komisionarja njoftoi se planifikon të vizitojë së shpejti Kosovën për të avancuar reformat që lidhen me Planin e Rritjes të BE-së.
Kujtojmë se më 16 prill, Kosova përfitoi 61.8 milionë euro si parafinancim nga Bashkimi Evropian, në kuadër të paketës së mbështetjes për Ballkanin Perëndimor 2024–2027, e cila arrin vlerën totale prej 6 miliardë eurosh.REL
