Presidenti i SHBA-së, Donald Trump, ka paralajmëruar se armëpushimi me Iranin mund të përfundojë pa u zgjatur, nëse nuk arrihet një marrëveshje mes palëve në ditët në vijim.
Në një intervistë për Bloomberg, Trump u shpreh se është “jashtëzakonisht e pamundur” që armëpushimi të vazhdojë përtej afatit aktual, nëse nuk ka dakordësi konkrete.
“Nuk do të nxitoj për të bërë një marrëveshje të keqe. Kemi gjithë kohën përpara,” deklaroi ai, duke lënë të hapur mundësinë e rifillimit të përplasjeve.
I pyetur për skenarin e një përshkallëzimi të menjëhershëm, Trump ishte i drejtpërdrejtë: “Nëse nuk ka marrëveshje, do ta prisja plotësisht.”
Ai kritikoi gjithashtu marrëveshjen bërthamore JCPOA, duke e cilësuar atë si një nga marrëveshjet më të këqija për sigurinë amerikane. Sipas tij, marrëveshja e re që po negociohet do të jetë “shumë më e mirë” dhe do të garantojë që Irani të mos sigurojë armë bërthamore.
Trump akuzoi administratat e mëparshme se i kanë dhënë Teheranit përfitime të mëdha financiare pa garanci të mjaftueshme, duke përmendur edhe transfertat e parave në kuadër të marrëveshjes së mëparshme.
Deklaratat e tij vijnë në një moment kritik për negociatat SHBA–Iran, ndërsa ende nuk është konfirmuar nëse dhe kur delegacionet do të zhvillojnë raundin e ardhshëm të bisedimeve në Islamabad.
Situata mbetet e tensionuar dhe çdo dështim për arritjen e marrëveshjes mund të rikthejë përplasjet në rajon, me pasoja të gjera për sigurinë ndërkombëtare.
