Kuraçao ka shkruar historinë në Kupën e Botës 2026, duke marrë pikën e parë në historinë e saj në një Botëror pas barazimit 0-0 ndaj Ekuadorit në ndeshjen e dytë të Grupit E.
Megjithëse Ekuadori dominoi takimin me 75 për qind të posedimit të topit dhe realizoi 28 goditje drejt portës, prej tyre 15 në kuadrat, skuadra e Kuraçaos arriti të rezistojë dhe të ruajë portën e paprekur deri në fund.
Për kombëtaren debutuese, kjo pikë ka vlerë historike, sidomos pas humbjes së thellë 7-1 ndaj Gjermanisë në ndeshjen hapëse.
Pas dy xhirove, renditja në Grupin E është:
- Gjermania – 6 pikë
- Bregu i Fildishtë – 3 pikë
- Ekuadori – 1 pikë
- Kuraçao – 1 pikë
Gjermania përmbys Bregun e Fildishtë në minutat e fundit
Në ndeshjen tjetër të grupit, Gjermania mposhti 2-1 Bregun e Fildishtë, duke siguruar kualifikimin për në fazën e 1/16-ës së finales.
Heroi i takimit ishte Deniz Undav, i cili u aktivizua nga stoli dhe realizoi dy gola, përfshirë golin vendimtar në minutën e 94-të, duke i dhënë tri pikë të arta skuadrës gjermane.
Japonia shkëlqen dhe eliminon Tunizinë
Në Grupin F, Japonia regjistroi një fitore bindëse 4-0 ndaj Tunizisë, në ndeshjen e 1000-të në historinë e fazave finale të Kupës së Botës.
Japonezët dominuan sfidën nga fillimi deri në fund, duke shënuar dy gola në pjesën e parë me Daichi Kamada dhe Ayase Ueda, ndërsa në pjesën e dytë realizuan edhe dy herë të tjera përmes Junya Ito dhe sërish Ueda, i cili kompletoi dopietën personale.
Me këtë humbje, Tunizia eliminohet matematikisht nga Botërori, ndërsa Japonia ngjitet në kuotën e katër pikëve dhe është shumë pranë kualifikimit në fazën tjetër.
Në ndeshjen e fundit të grupit, Japonisë i mjafton edhe një barazim ndaj Suedisë për të siguruar avancimin, ndërsa Tunizia do të përballet me Holandën vetëm për statistikë.
