Botërori 2026 vazhdon të dhurojë surpriza të mëdha. Norvegjia shkroi historinë duke eliminuar Brazilin me rezultat 2-1, ndërsa Anglia mposhti Meksikën me 3-2, pavarësisht se luajti me një futbollist më pak për më shumë se gjysmë ore. Tashmë dy skuadrat do të përballen mes vete në çerekfinale.
Haaland dërgon Norvegjinë në histori, Brazili eliminohet
Norvegjia siguroi për herë të parë një vend në çerekfinalen e Kupës së Botës, falë një paraqitjeje të shkëlqyer ndaj pesë herë kampionit të botës, Brazilit.
Heroi i mbrëmjes ishte Erling Haaland, i cili realizoi të dy golat e fitores. Sulmuesi norvegjez shënoi në minutën e 79-të pas një asistimi të Schjelderup, ndërsa në minutat shtesë vulosi triumfin me një goditje të fuqishme nga jashtë zonës.
Brazili pati mundësinë të kalonte në epërsi që në pjesën e parë, por portieri Nyland priti penalltinë e ekzekutuar nga Bruno Guimarães. Goli i vetëm i brazilianëve erdhi në minutën e 100-të, kur Neymar realizoi nga pika e bardhë, por ishte tepër vonë për të shmangur eliminimin.
Me këtë sukses, Haaland arrin kuotën e shtatë golave në Botërorin 2026, duke u barazuar me Lionel Messi dhe Kylian Mbappé në krye të listës së golashënuesve.
Pas ndeshjes, trajneri Carlo Ancelotti e cilësoi humbjen si “hapin e parë të një cikli të ri”, ndërsa Neymar la të kuptohet se aventura e tij me kombëtaren braziliane ka përfunduar.
Anglia fiton me 10 lojtarë dhe siguron çerekfinalen
Në ndeshjen tjetër të fazës së 1/8 së finales, Anglia triumfoi 3-2 ndaj Meksikës në stadiumin “Azteca”, në një sfidë që nisi me një orë vonesë për shkak të kushteve atmosferike.
Jude Bellingham ishte protagonisti kryesor i pjesës së parë, duke realizuar dy gola brenda dy minutave. Meksika ngushtoi rezultatin para pushimit me Julián Quiñones.
Në minutën e 54-t, Anglia mbeti me dhjetë futbollistë pas kartonit të kuq të Jarell Quansah, por pavarësisht inferioritetit numerik, Harry Kane realizoi golin e tretë nga penalltia.
Raúl Jiménez shënoi për 3-2 nga pika e bardhë, por Meksika nuk arriti të përmbyste rezultatin.
Çerekfinalja e radhës
Pas këtyre fitoreve, Norvegjia dhe Anglia do të përballen në çerekfinalen e Kupës së Botës më 11 korrik, në një duel që premton spektakël, me Erling Haaland dhe Jude Bellingham ndër emrat më të spikatur të turneut.
