Një 31-vjeçar nga Swindon, në jug të Anglisë, është akuzuar se u ka dhënë personave të lidhur me inteligjencën ushtarake ruse informacione për fabrikat e dronëve në Mbretërinë e Bashkuar, ndërsa prokurorët pretendojnë se ai kishte ofruar edhe të kryente vetë një akt sabotimi.
Joshua Cammidge u paraqit më 10 shtator në Gjykatën e Magjistraturës së Westminsterit në Londër, ku u akuzua për dy vepra penale në bazë të Aktit të Sigurisë Kombëtare të Mbretërisë së Bashkuar: ndihmë për një shërbim të huaj inteligjence dhe përgatitje për kryerjen e sabotimit.
Sipas Shërbimit të Prokurorisë së Kurorës (CPS), Cammidge dyshohet se ka ndarë pamje të ekranit nga Google Maps, të cilat tregonin një fabrikë dronësh dhe katër objekte të tjera të prodhimit të dronëve në Swindon.
Prokurorët pretendojnë gjithashtu se ai kishte ofruar të kryente vetë një akt sabotimi dhe se kishte kërkuar informacione për një pajisje që mund të përdorej për të bllokuar sinjalet Wi-Fi.
Ai akuzohet edhe se i kishte vëzhguar personalisht disa prej objekteve.
Sipas CPS-së, personi me të cilin dyshohet se kishte komunikuar Cammidge besohet të ketë lidhje me Korpusin Vullnetar GRU, një grup që prokurorët britanikë e përshkruajnë si të kontrolluar nga shërbimi i inteligjencës ushtarake ruse, GRU.
Sjellja e dyshuar nga autoritetet britanike thuhet se ka ndodhur nga fundi i marsit deri në fillim të shtatorit të vitit 2026.
Frank Ferguson, Kryeprokuror i Kurorës për Divizionin e Krimeve Speciale dhe Kundër Terrorizmit të CPS-së, tha se prokuroria kishte vlerësuar se ekzistojnë prova të mjaftueshme për ta dërguar çështjen në gjykatë.
“Shërbimi i Prokurorisë së Kurorës ka vendosur të ndjekë penalisht Joshua Cammidge për vepra penale të Aktit të Sigurisë Kombëtare pas një hetimi të Policisë Kundër Terrorizmit”, deklaroi Ferguson.
Sipas tij, prokurorët kanë vlerësuar se ndjekja penale është në interes të publikut.
Cammidge nuk u deklarua fajtor në Gjykatën e Magjistraturës së Westminsterit dhe u la në paraburgim. Çështja është transferuar në Gjykatën Old Bailey në Londër, ku ai pritet të paraqitet më 25 shtator.
Rasti vjen në një periudhë të tensionuar të marrëdhënieve mes Rusisë dhe Mbretërisë së Bashkuar, të cilat janë përkeqësuar ndjeshëm pas një sërë incidentesh të lidhura me sigurinë dhe spiunazhin.
Ndër rastet më të njohura janë helmimi i Alexander Litvinenkos në vitin 2006 dhe sulmi me agjent nervor në Salisbury në vitin 2018, ku u shënjestruan Sergei Skripal dhe vajza e tij.
Mbretëria e Bashkuar është ndër mbështetësit kryesorë evropianë të Ukrainës që nga pushtimi i plotë rus në vitin 2022. Në këtë kontekst, objektet britanike që lidhen me prodhimin e dronëve kanë marrë rëndësi të shtuar strategjike.
Cammidge konsiderohet i pafajshëm derisa fajësia e tij të vërtetohet nga gjykata.
