Sekretari i Përgjithshëm i NATO-s, Mark Rutte, ka deklaruar nga Berlini se Aleanca mbetet e bashkuar përballë Rusisë dhe se përpjekjet e Moskës për të përçarë vendet anëtare nuk do të kenë sukses.
Pas takimit me ministrin e Jashtëm gjerman, Johann Wadephul, Rutte tha se NATO qëndron në krah të Gjermanisë pas asaj që ai e cilësoi si një sulm hibrid rus në Leipzig.
“Rusia kërkon të na përçajë, por ne jemi të bashkuar. Rusia kërkon të na pengojë të ndihmojmë Ukrainën, por ne do të bëjmë edhe më shumë për Ukrainën. Rusia kërkon të tregojë forcë, por ne jemi më të fortë”, u shpreh Rutte.
Ai vlerësoi reagimin e Gjermanisë ndaj incidentit në Leipzig dhe tha se vendet anëtare të NATO-s i kanë shprehur mbështetje Berlinit.
Rutte theksoi se Aleanca po forcon kapacitetet e saj parandaluese dhe mbrojtëse përballë kërcënimeve nga Rusia. Sipas tij, aleatët po rrisin gjithashtu presionin ndaj Moskës përmes masave kundër të ashtuquajturës “flota në hije”, ndërsa po ndërmerren hapa për mbrojtjen e infrastrukturës kritike, përfshirë dislokimin e forcave në Detin Baltik.
Duke folur për Ukrainën, Rutte e cilësoi Gjermaninë si mbështetësen më të fortë të Kievit dhe falënderoi ministrin Wadephul për angazhimin e tij në mbështetje të Ukrainës.
Kreu i NATO-s vlerësoi edhe planin e Gjermanisë për të rritur shpenzimet bazë për mbrojtjen në 3.5 për qind të Prodhimit të Brendshëm Bruto deri në vitin 2029.
Sipas Rutte-s, industria gjermane e mbrojtjes, nga kompanitë e mëdha deri te startup-et inovative, po rrit prodhimin dhe po kontribuon në forcimin e kapaciteteve të sigurisë dhe mbrojtjes së NATO-s.
Në përfundim, Rutte tha se NATO do të vazhdojë të përshtatet dhe të forcojë aftësitë e saj për të garantuar sigurinë e rreth një miliard qytetarëve të vendeve anëtare.
Ai falënderoi Gjermaninë për rolin e saj udhëheqës brenda Aleancës dhe për mbështetjen e vazhdueshme ndaj Ukrainës.
