Kryetari i Prishtinës, Përparim Rama, ka bërë thirrje që në seancën e nesërme të Kuvendit Komunal të votohet themelimi i Kompanisë Komunale “Pastrimi”.
Rama e ka cilësuar këtë si një prej vendimeve më të rëndësishme për kryeqytetin, duke theksuar se gjendja me mbeturinat nuk mund të vazhdojë më në këtë mënyrë.
Sipas tij, Prishtina është rritur dhe nevojat e qytetarëve janë shumëfishuar, ndërsa sistemi aktual i menaxhimit të mbeturinave nuk po arrin t’u përgjigjet nevojave të kryeqytetit.
Ai u ka bërë thirrje të gjithë asamblistëve, veçanërisht atyre të Lëvizjes Vetëvendosje, që ta votojnë themelimin e kompanisë komunale.
“Qytetarët ju kanë votuar me marrë vendime që ua zgjidhin problemet. Bërllogu është në lagjet ku jetoni edhe ju, në rrugët ku kalojnë fëmijët tuaj, në qytetin ku jetojnë familjet tuaja!”, ka shkruar Rama.
Kryetari i Prishtinës ka kritikuar mundësinë që vendimi të pengohet për arsye politike.
“Nëse vendosni me penalizu vetveten për politikë, atëherë kjo kalon çdo logjikë. Propozimi është gati. Zgjidhja është gati. Votojeni!”, ka deklaruar ai.
