Profesori amerikan dhe njohësi i çështjeve të Ballkanit, Daniel Serwer, ka shprehur rezerva të forta lidhur me procesin gjyqësor që po zhvillohet në Dhomat e Specializuara të Kosovës ndaj ish-krerëve të Ushtria Çlirimtare e Kosovës.
Në një intervistë për ABC News, Serwer tha se e konsideron të padrejtë faktin që të akuzuarit po mbahen në paraburgim prej pesë vitesh pa një vendim përfundimtar nga gjykata.
“Unë nuk do të parashikoj vendimet e gjykatës. Megjithatë, mendoj se është e padrejtë që njerëzit të mbahen në burg për pesë vite pa një vendim përfundimtar”, deklaroi ai.
Duke folur për ish-presidentin e Kosovës, Hashim Thaçi, Serwer tha se nuk beson që ai ka pasur autoritet komandues mbi UÇK-në në mënyrën që pretendohet nga prokuroria.
“E njoh personalisht Hashim Thaçin. E kam takuar menjëherë pas luftës, gjatë vizitës së tij të parë në Uashington. Në atë kohë nuk besoj se ai kishte autoritet komandues mbi UÇK-në në mënyrën që pretendojnë prokurorët”, u shpreh ai.
Profesori amerikan pranoi se pas luftës në Kosovë ka pasur episode dhune, përfshirë incidente ndaj serbëve dhe përplasje politike ndërmjet mbështetësve të UÇK-së dhe atyre të Lidhja Demokratike e Kosovës, por i cilësoi ato si ngjarje të veçuara dhe fatkeqe.
Serwer rikujtoi gjithashtu se akuzat për trafikim organesh, të cilat në masë të madhe nxitën krijimin e tribunalit special, sipas tij rezultuan të pabazuara.
“Akuzat për trafik organesh, të cilat çuan në krijimin e tribunalit, ishin të rreme. Unë vetë mbështeta krijimin e gjykatës sepse besoja se ato akuza nuk do të qëndronin. Në këtë kuptim, kam gabuar”, tha ai.
Në fund, ai vlerësoi se procesi ka ngritur dilema serioze mbi drejtësinë dhe standardet procedurale, duke shtuar se janë shpenzuar mjete të konsiderueshme financiare për një gjykim që, sipas tij, vazhdon të shkaktojë debat mbi legjitimitetin dhe efektivitetin e tij.
