Kryetarja e Kuvendit të Kosovës, Albulena Haxhiu, ka shtyrë vazhdimin e seancës së sotme për nesër në orën 11:00, pasi deputetët nuk u kthyen në sallë edhe 30 minuta pas përfundimit të pauzës.
Haxhiu tha se nuk është serioze që deputetët të vonohen dhe se ajo nuk mund të presë pa afat për vazhdimin e punimeve.
“Seanca i vazhdon punimet nesër në orën 11:00. Nuk është serioze që edhe 30 minuta pas orës 14:00 deputetët nuk po vijnë. Unë nuk kam mundësi të funksionoj e të pres deri në pafundësi”, deklaroi Haxhiu.
Në momentin e shtyrjes, në sallën e Kuvendit ndodheshin disa deputetë të PDK-së dhe LDK-së, si dhe vetëm dy deputetë të Lëvizjes Vetëvendosje.
Në rendin e ditës për seancën ishin paraparë shqyrtimi i katër marrëveshjeve ndërkombëtare, interpelanca me ministrin e Shëndetësisë, Arben Vitia, mocioni për çështjen e energjisë dhe diskutimi për Ligjin për Gjykatën Speciale.
Punimet e Kuvendit pritet të vazhdojnë nesër, më 13 nëntor, në orën 11:00.
