Policia e Kosovës ka njoftuar për realizimin e dy ekstradimeve në raste të ndara, në bashkëpunim me autoritetet ndërkombëtare dhe përmes INTERPOL.
Sipas njoftimit, më 30 prill 2026, një shtetas kosovar është ekstraduar nga Kroacia për në Kosovë. Ai ishte arrestuar nga autoritetet kroate pasi kërkohej me urdhër ndërkombëtar për vepra penale që lidhen me posedim, shpërndarje dhe shitje të substancave narkotike, si dhe armëmbajtje pa leje. Pas kthimit në Kosovë, i dyshuari i është dorëzuar njësive kompetente për procedura të mëtejshme ligjore.
Ndërkohë, më 1 maj 2026, një tjetër shtetas kosovar është ekstraduar nga Kosova për në Suedi, ku kërkohej nga autoritetet suedeze nën dyshimin për veprën penale “dhunim”.
Policia thekson se të dyja ekstradimet janë realizuar në përputhje me ligjet në fuqi dhe si rezultat i bashkëpunimit të ngushtë ndërkombëtar.
Drejtoria për Bashkëpunim Ndërkombëtar Policor ka bërë të ditur se do të vazhdojë koordinimin me institucionet vendore dhe partnerët ndërkombëtarë për luftimin e krimit dhe kapjen e personave të kërkuar, brenda dhe jashtë vendit.
