E mërkura në Kosovë pritet të karakterizohet me mot mjaft të nxehtë veror dhe me zagushi. Gjatë pjesës së parë të ditës priten periudha me diell, ndërsa pasdite kushtet atmosferike do të bëhen më të paqëndrueshme.
Gjatë pasdites, vende-vende pritet shtim i vranësirave dhe zhvillim konvektiv, që mund të sjellë rrebeshe lokale shiu, vetëtima dhe bubullimë, kryesisht në viset kodrinore-malore.
Rrebeshet me bubullima priten më së shumti në jug dhe juglindje të Kosovës, si dhe në veriperëndim, ndërsa lokalisht mund të shfaqen edhe në zona të tjera të vendit.
Megjithatë, këto reshje do të jenë të karakterit lokal dhe nuk pritet të përfshijnë të gjitha viset e Kosovës.
Temperaturat pritet të luhaten nga 14°C deri në 31°C, duke e mbajtur ditën mjaft të nxehtë, sidomos para zhvillimit të vranësirave dhe rrebesheve.
