FIFA ka përditësuar listën e klubeve që kanë ndalim për regjistrimin e futbollistëve të rinj për shkak të detyrimeve financiare të papaguara ndaj ish-lojtarëve ose ish-zyrtarëve. Në mesin e tyre janë shtuar edhe dy klube shqiptare: Dinamo dhe Kukësi.
Sipas vendimeve të publikuara nga FIFA, të dy klubet janë ndëshkuar me bllokim të merkatos për tre dritare transferimesh, deri në shlyerjen e plotë të detyrimeve financiare.
Kukësi me ndalim që nga 5 gushti
Klubi i Kukësit është njoftuar më 5 gusht për ndalimin e regjistrimit të lojtarëve të rinj. Sanksioni do të mbetet në fuqi derisa klubi të paguajë shumën e përcaktuar në vendimin e FIFA-s ndaj palës që ka fituar kontestin.
Edhe Dinamo përballet me të njëjtin penalitet
Një ditë më vonë, më 6 gusht, FIFA vendosi të njëjtën masë edhe ndaj Dinamos, pas humbjes së një çështjeje me ish-punonjës të klubit.
Klubi kryeqytetas nuk do të mund të regjistrojë futbollistë të rinj derisa të shlyejë detyrimet financiare ndaj kreditorëve.
Ky zhvillim vjen në një moment të rëndësishëm për Dinamon, e cila është e angazhuar në garat evropiane dhe po përgatitet për ndeshjen e kthimit ndaj skuadrës letoneze Auda, pas humbjes 1-0 në takimin e parë.
Lista e klubeve shqiptare me merkaton e bllokuar
Përveç Dinamos dhe Kukësit, në listën e FIFA-s figurojnë edhe:
- Tirana
- Skënderbeu
- Bylis
- Kastrioti
- Flamurtari
- Valbona
Si hiqet ndalimi?
Sipas rregullave të FIFA-s, bllokimi i merkatos hiqet sapo klubi:
- shlyen plotësisht detyrimet financiare ndaj ish-lojtarëve ose ish-zyrtarëve;
- paraqet provat e pagesës.
Pas verifikimit të dokumentacionit, FIFA procedon me heqjen e ndalimit dhe klubi fiton të drejtën të regjistrojë futbollistë të rinj në afatin kalimtar. Burimi. Raport-tv.al
