Qeveria gjermane po planifikon ndryshime të rëndësishme në sistemin e kartave të identitetit dhe pasaportave, duke synuar digjitalizimin dhe thjeshtimin e procedurave për qytetarët. Rregullat e reja pritet të hyjnë në fuqi gjatë gjysmës së dytë të vitit 2026.
Sipas raportimeve, një nga ndryshimet kryesore lidhet me krijimin e Portofolit Evropian të Identitetit Dixhital (EUDI Wallet), i cili tashmë është miratuar nga Qeveria Federale Gjermane.
Ky sistem do t’u mundësojë qytetarëve që kartën e identitetit ta kenë edhe në telefonat inteligjentë, ndërsa në të ardhmen mund të përfshihen edhe dokumente të tjera si patentë-shoferët apo dokumente të tjera personale.
Përdoruesit do të mund ta përdorin identitetin dixhital për një sërë shërbimesh, si:
- hapja e llogarive bankare;
- nënshkrimi i kontratave;
- verifikimi i moshës;
- identifikimi online dhe fizik.
Sipas autoriteteve gjermane, sistemi do të ndajë vetëm informacionin e nevojshëm për secilin rast. Për shembull, gjatë blerjes së alkoolit do të konfirmohet vetëm fakti nëse personi ka moshën e kërkuar, pa zbuluar të dhëna të tjera personale.
Përdorimi i aplikacionit do të jetë vullnetar dhe siguria do të garantohet përmes PIN-it, gjurmës së gishtit ose njohjes së fytyrës. Në rast humbjeje të telefonit, identiteti dixhital mund të bllokohet menjëherë.
Lehtësira për të moshuarit
Një tjetër ndryshim i rëndësishëm prek qytetarët mbi moshën 70-vjeçare. Ata që aplikojnë për kartë identiteti pas kësaj moshe nuk do të detyrohen më ta rinovojnë dokumentin çdo 10 vjet.
Megjithatë, pas skadimit të afatit, funksionet online të identifikimit mund të mos jenë më aktive dhe përdorimi ndërkombëtar mund të ketë kufizime.
Ndryshime edhe për pasaportat
Qeveria gjermane planifikon gjithashtu të heqë detyrimin për ndryshimin e adresës në pasaportë pas zhvendosjes në një vendbanim të ri.
Sipas autoriteteve, kjo masë mund të shmangë rreth 1.2 milion procedura për ndryshim adrese çdo vit, duke reduktuar barrën administrative për qytetarët.
Para hyrjes në fuqi, projektligji duhet të miratohet nga Bundestagu dhe Bundesrati, e më pas të publikohet në Gazetën Federale të Ligjit.