Shumica dërrmuese e të huajve që kanë marrë shtetësinë gjermane vitin e kaluar kanë zgjedhur të mbajnë edhe pasaportën e vendit të tyre të origjinës, sipas një studimi të publikuar nga instituti Mediendienst Integration.
Sipas të dhënave të raportit, mes 85% dhe 95% e personave të natyralizuar në Gjermani kanë përfituar nga mundësia e shtetësisë së dyfishtë, e cila u bë e mundur pas reformës ligjore të miratuar në vitin 2024.
Reforma e re dhe efektet në praktikë
Legjislacioni i ri gjerman e ka lehtësuar ndjeshëm procesin e natyralizimit. Afati minimal i qëndrimit për aplikim është ulur nga tetë në pesë vjet, ndërsa për personat me integrim të avancuar është lejuar aplikimi edhe pas tre vjetësh qëndrimi. Megjithatë, qeveria aktuale ka vendosur të shfuqizojë pjesërisht procedurat e përshpejtuara.
Pavarësisht ndryshimeve, interesi për shtetësinë gjermane mbetet i lartë, ndonëse në vitin 2025 është shënuar një rënie prej rreth 10% të aplikimeve krahasuar me një vit më parë. Në total janë regjistruar rreth 189,000 kërkesa për natyralizim.
Ku janë përqendruar aplikimet
Sipas raportit, Berlini kryeson me rreth 36,100 aplikime, i ndjekur nga qytete të mëdha si Mynihu me rreth 17,800 aplikime. Në disa qytete është krijuar gjithashtu një listë e gjatë pritjeje, me dhjetëra mijëra persona që presin vendim nga autoritetet.
Në nivel kombëtar, vlerësohet se mbi 300,000 persona kanë marrë shtetësinë gjermane gjatë vitit të kaluar.
Origjina e qytetarëve të rinj
Numri më i madh i të natyralizuarve vjen nga Siria, Turqia, Afganistani, Irani dhe Rusia. Ndërkohë, mundësia e mbajtjes së shtetësisë së mëparshme ka pasur ndikim të veçantë për qytetarët nga Ballkani Perëndimor, të cilët prej vitesh jetojnë dhe punojnë në Gjermani.
Kjo reformë u lejon atyre të fitojnë të drejta të plota si qytetarë gjermanë, pa u detyruar të heqin dorë nga pasaporta e vendit të origjinës.
