Nga 1 janari 2027, kufiri i të ardhurave për personat që punojnë në të ashtuquajturat “Minijob” në Gjermani do të rritet nga 603 në 633 euro në muaj. Po ashtu, paga minimale do të jetë 14.60 euro në orë. Kjo do të ndikojë drejtpërdrejt në numrin e orëve që punonjësit mund të punojnë pa e humbur statusin e mini-punës.
Personat nga diaspora shqiptare që jetojnë dhe punojnë në Gjermani duhet të kenë parasysh ndryshimet e reja që hyjnë në fuqi më 1 janar 2027.
Sipas vendimit të autoriteteve gjermane, paga minimale statutore do të rritet nga 13.90 euro në vitin 2026 në 14.60 euro për orë në vitin 2027.
Si pasojë e kësaj rritjeje, do të rritet automatikisht edhe kufiri i të ardhurave për një Minijob, nga 603 euro në 633 euro në muaj. Në bazë vjetore, punonjësit mund të fitojnë deri në 7,596 euro dhe të ruajnë statusin e mini-punës.
Çfarë është Minijob dhe çfarë ndryshon nga viti 2027?
Minijob është një formë punësimi në Gjermani, ku punonjësi mund të fitojë deri në një kufi të caktuar mujor pa kaluar në kategorinë tjetër të punësimit, e njohur si Midijob.
Kufiri i të ardhurave është i lidhur me pagën minimale dhe llogaritet në mënyrë që një person që paguhet me pagën minimale të mund të punojë mesatarisht rreth 10 orë në javë.
Me rritjen e pagës minimale në 14.60 euro, kufiri i ri do të jetë 633 euro në muaj, që përkthehet në rreth 43.4 orë pune në muaj, nëse punonjësi paguhet me pagën minimale.
Pra, nuk është ndryshuar vetëm shuma që mund të fitohet, por edhe numri i orëve që mund të punohet, varësisht nga paga për orë.
Sa orë mund të punoni në muaj në vitin 2027?
Numri i orëve varet nga paga që merrni për një orë pune. Sa më e lartë të jetë paga për orë, aq më pak orë mund të punoni për të mos e tejkaluar kufirin prej 633 eurosh.
| Pagesa për orë | Orë në muaj më 2026 (603 €) | Orë në muaj më 2027 (633 €) |
|---|---|---|
| 14.60 € | – | 43.4 |
| 15 € | 40.2 | 42.2 |
| 16 € | 37.7 | 39.6 |
| 17 € | 35.5 | 37.2 |
| 18 € | 33.5 | 35.2 |
| 20 € | 30.2 | 31.6 |
Për shembull, nëse një punonjës paguhet 15 euro në orë, nga viti 2027 mund të punojë rreth 42.2 orë në muaj dhe të fitojë deri në 633 euro.
Ndërsa nëse paguhet 18 euro në orë, mund të punojë rreth 35.2 orë në muaj.
Personat që paguhen me pagën minimale prej 14.60 eurosh mund të punojnë rreth 43.4 orë në muaj, ose afërsisht 10 orë në javë.
Kujdes: Kur Minijob shndërrohet në Midijob?
Një çështje e rëndësishme për punonjësit është tejkalimi i kufirit prej 633 eurosh.
Nëse të ardhurat e rregullta kalojnë këtë shumë, punësimi nuk trajtohet më si Minijob, por mund të kalojë në kategorinë Midijob.
Për shembull, një person që gjatë vitit 2026 punon 43 orë në muaj me pagesë prej 13.90 eurosh, fiton rreth 598 euro. Por nëse nga janari 2027 paga e tij rritet në 15 euro në orë dhe vazhdon të punojë të njëjtin numër orësh, të ardhurat arrijnë në 645 euro.
Kjo shumë tejkalon kufirin e ri prej 633 eurosh. Prandaj, punonjësi dhe punëdhënësi duhet të rishikojnë numrin e orëve të punës për të ruajtur statusin e Minijob-it.
Në kategorinë Midijob, punonjësi paguan kontribute për sigurimet shoqërore, përfshirë sigurimin shëndetësor, atë të kujdesit afatgjatë dhe sigurimin e papunësisë. Kontributet e punëmarrësit janë të reduktuara në pjesën e poshtme të këtij diapazoni dhe rriten gradualisht.
A lejohet të fitoni më shumë se 633 euro në ndonjë muaj?
Po. Rregullat gjermane lejojnë që të ardhurat të ndryshojnë nga një muaj në tjetrin, për sa kohë që të ardhurat e rregullta të parashikuara për vitin nuk e tejkalojnë kufirin vjetor prej 7,596 eurosh.
Kjo do të thotë se një punonjës mund të punojë më shumë orë në një muaj dhe më pak në muajt e tjerë, nëse mesatarja vjetore mbetet brenda kufirit të lejuar.
Ekziston edhe një përjashtim për rritjen e paparashikuar të të ardhurave, për shembull kur punonjësi duhet të zëvendësojë një koleg që është në pushim mjekësor.
Një tejkalim i tillë mund të lejohet deri në dy muaj kalendarikë brenda vitit, ndërsa të ardhurat në secilin prej këtyre muajve nuk duhet të kalojnë dyfishin e kufirit mujor, pra 1,266 euro në vitin 2027. Ky përjashtim nuk vlen për orët shtesë që janë planifikuar paraprakisht si pjesë e rregullt e punës.
Çfarë duhet të bëjnë punonjësit shqiptarë në Gjermani?
Para fillimit të vitit 2027, personat që punojnë me Minijob duhet të kontrollojnë kontratën e punës, pagën për orë dhe numrin e orëve të dakorduara.
Nëse paga për orë rritet, mund të jetë e nevojshme të zvogëlohet numri i orëve mujore, në mënyrë që të mos tejkalohet kufiri prej 633 eurosh.
Në të kundërt, nëse paga për orë mbetet e njëjtë, punonjësit mund të kenë mundësi të punojnë pak më shumë orë sesa në vitin 2026.
Edhe punëdhënësit duhet të rishikojnë parashikimin e të ardhurave vjetore dhe të përfshijnë në llogaritje pagesat shtesë të garantuara, siç është bonusi i Krishtlindjeve. Këto pagesa mund të ndikojnë në tejkalimin e kufirit vjetor, edhe nëse paga mujore e zakonshme është nën 633 euro.
Ndryshimet e reja janë veçanërisht të rëndësishme për mijëra shqiptarë në Gjermani që e përdorin Minijob-in si punë shtesë krahas punësimit kryesor, studimeve ose angazhimeve familjare.
