Kompania “Mabco”, e drejtuar nga biznesmeni Behgjet Pacolli, ka fituar betejën gjyqësore në Gjykata e Lartë lidhur me çështjen e aeroportit të Vlorës.
Kolegji Administrativ i Gjykatës së Lartë ka vendosur të rrëzojë padinë e paraqitur nga kompania “2A Group”, e drejtuar nga biznesmeni Valon Ademi. Me këtë vendim, “Mabco” rikthen të drejtat për administrimin dhe vendimmarrjen në projektin e aeroportit të Vlorës.
Ademi kishte kërkuar pezullimin e aktivitetit të ortakut tjetër, heqjen e të drejtës së votës dhe nisjen e procedurës për përjashtimin e tij nga shoqëria.
Përplasja mes dy kompanive është shoqëruar edhe me tensione në terren. Prej disa ditësh, palët kanë pasur mosmarrëveshje në kantierin e aeroportit, ndërsa kompania “2A Group” raportohet se nuk ka lejuar punonjësit e “Mabco”-s të hyjnë në ambientet e projektit.
Më herët, Gjykata e Tiranës dhe Gjykata e Apelit kishin vendosur në favor të “2A Group”, duke pranuar kërkesën për sigurimin e padisë dhe pezullimin e të drejtave vendimmarrëse të “Mabco”-s deri në marrjen e një vendimi përfundimtar.
Ndërkohë, ministri i Energjisë dhe Infrastrukturës, Enea Karakaçi, kishte paralajmëruar se vonesat në zbatimin e kontratës mund të sjellin penalitete, madje edhe mundësinë e prishjes së njëanshme të kontratës koncesionare.
Përplasja mes dy ortakëve ka nisur që në dhjetor të vitit të kaluar dhe lidhet me çështje të aksioneve dhe menaxhimit të aeroportit të Vlorës.
Përveç procesit civil, Prokuroria e Tiranës ka nisur hetime ndaj Behgjet Pacollit, vëllait të tij Emin Pacolli dhe administratorit të kompanisë mëmë në Zvicër, Nelson Çela. Ata po hetohen për vepra të dyshuara si mashtrim me pasoja të rënda, mashtrim kompjuterik dhe falsifikim dokumentesh.Burimi:Raport-tv.al