Kreu i Partisë Demokratike të Kosovës (PDK), Bedri Hamza, ka konfirmuar se deputetët e kësaj partie do të marrin pjesë në vazhdimin e seancës konstituive të Kuvendit të Kosovës, e cila pritet të mbahet më 7 shtator.
Pas mbledhjes së Kryesisë së PDK-së dhe Grupit Parlamentar, Hamza tha se deputetët e PDK-së do të jenë të pranishëm në seancë, duke shprehur shpresën se vazhdimi i saj do të çojë drejt konstituimit të Kuvendit.
Hamza: Shpresojmë që seanca të mos përfundojë pa rezultat
Hamza tha se PDK-ja do të marrë pjesë në seancë, ndërsa uroi që kjo thirrje të mos jetë e destinuar të përfundojë pa rezultat.
Ai theksoi rëndësinë që Kuvendi të konstituohet dhe institucionet e vendit të funksionalizohen.
“Presim që kjo thirrje të mos jetë vetëm një kalkulim, por të çojë drejt konstituimit të Kuvendit”, tha Hamza.
PDK-ja është partia e radhës që ka konfirmuar pjesëmarrjen e deputetëve të saj në vazhdimin e seancës konstituive, në përpjekje për t’i dhënë fund ngërçit institucional.
