Kryetari i PDK-së, Bedri Hamza, ka deklaruar se mosmarrëveshja për zgjedhjen e nënkryetarëve të Kuvendit nuk lidhet me emrat e kandidatëve, por me respektimin e Kushtetutës dhe rregullave për përfaqësimin e subjekteve politike.
Në një lidhje telefonike në emisionin “Debat Plus”, Hamza tha se qëndrimi i PDK-së është i qartë dhe se postet e nënkryetarëve u takojnë subjekteve politike sipas radhës së përcaktuar me Kushtetutë.
“E din ai [Kurti] qëndrimin e PDK-së, ia kam bërë shumë të qartë. Është e rregulluar me Kushtetutë kujt i takojnë nënkryetarët. Janë poste që iu takojnë subjekteve politike sipas radhës, qysh janë zgjedhur në të kaluarën, dhe kjo e ka logjikën e vet. Me i pasë opozita numrat është pozitë”, deklaroi Hamza.
I pyetur nëse duhet të diskutohet për ndryshimin e emrave të kandidatëve për nënkryetarë, kryetari i PDK-së tha se kjo nuk është çështje emrash.
“Nuk është çështje emrash kjo. Nuk janë ata që e përcaktojnë kush ka me qenë nënkryetar nga radhët e PDK-së”, tha ai.
Hamza e cilësoi kundërshtimin ndaj kandidatëve të propozuar si një “gjetje të re”, përmes së cilës, sipas tij, po vazhdohet vakuumi institucional.
“Kjo është një gjetje e re e tyre për me vazhdu këtë vakum institucional, me dëmtu shtetin e qytetarët e Kosovës, me rezultatet e dobëta në arsim, me gjitha problemet që ia ka shkaktu vendit, që tri vite thuajse duke e mbajtur vendin të bllokuar”, deklaroi Hamza.
Ai përsëriti se PDK-ja e konsideron respektimin e rregullave kushtetuese dhe të rendit të përfaqësimit politik si bazë për përfundimin e procesit të konstituimit të Kuvendit.Burimi: Debat plus tv.Dukagjini.
