Deputetja e Lidhjes Demokratike të Kosovës (LDK), Hykmete Bajrami, ka reaguar ndaj qëndrimit të Lëvizjes Vetëvendosje (LVV) lidhur me votimin e kandidatëve për drejtues të Kuvendit të Kosovës.
Bajrami u ka drejtuar disa pyetje eksponentëve të LVV-së, duke rikujtuar periudhën kur kjo parti ishte në opozitë dhe duke vënë në pikëpyetje mënyrën se si kishte vepruar atëherë për zgjedhjen e institucioneve.
“Pyetni eksponentët e LVV-së, kur kanë qenë në opozitë:
– A kanë votuar ndonjëherë për kryetar të Kuvendit?
– Me votat e kujt janë zgjedhur Aida Dërguti dhe Glauk Konjufca nënkryetarë të Kuvendit?
– A kanë votuar ndonjëherë për President të Kosovës, duke qenë vetë në opozitë?”, ka shkruar Bajrami.
Në fund të reagimit, deputetja e LDK-së i ka akuzuar eksponentët e LVV-së për hipokrizi, duke e përmbyllur postimin me fjalën: “Hipokrita!”.
Reagimi i Bajramit vjen në një kohë kur në Kuvend po zhvillohet debat rreth zgjedhjes së nënkryetarëve dhe votimit të kandidatëve të propozuar nga subjektet politike. Sipas raportimeve, LVV ka refuzuar të votojë kandidatët e LDK-së për këto poste.
Me këtë reagim, Bajrami e ka zhvendosur debatin te praktikat e mëparshme të LVV-së, duke kërkuar që qëndrimet aktuale të saj të krahasohen me mënyrën se si ka vepruar gjatë kohës kur ishte në opozitë.
