Ushtruesja e detyrës së presidentes së Kosovës, Albulena Haxhiu, ka reaguar pas aktgjykimit të sotëm të Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit.
Haxhiu i ka cilësuar dënimet si “goditje të rëndë” për familjet e tyre dhe si një ditë të rëndë për Kosovën dhe kombin shqiptar.
“Aktgjykimi i sotëm dhe dënimet e shqiptuara ndaj Hashim Thaçit, Kadri Veselit, Jakup Krasniqit dhe Rexhep Selimit janë një goditje e rëndë për familjet e tyre, një lajm thellësisht tronditës për Republikën e Kosovës dhe një çast i rëndë për kombin shqiptar kudo që jeton”, ka shkruar Haxhiu.
Ajo ka kujtuar periudhën e luftës në Kosovë dhe krimet e kryera nga regjimi i Serbisë ndaj popullsisë civile shqiptare.
“Kosova e ka përjetuar mbi vete dhunën e një aparati shtetëror që vrau civilë, kreu masakra, dëboi qindra mijëra shqiptarë nga shtëpitë e tyre dhe la pas mijëra të vrarë e të zhdukur. Kjo përvojë është pjesë e pashlyeshme e kujtesës së Kosovës dhe të kombit shqiptar”, ka deklaruar ajo.
Haxhiu ka shprehur solidaritet me familjet e katër ish-krerëve të UÇK-së, duke theksuar se procesi juridik nuk ka përfunduar.
“Mendimet e mia janë, para së gjithash, me familjet e Hashim Thaçit, Kadri Veselit, Jakup Krasniqit dhe Rexhep Selimit. Prej vitesh ato mbajnë barrën e mungesës, pritjes dhe pasigurisë. Dënimet e sotme e bëjnë këtë barrë edhe më të rëndë”, ka shkruar Haxhiu.
Ajo u ka bërë thirrje familjeve që të qëndrojnë të forta, duke theksuar se e drejta e ankimit është pjesë e procesit gjyqësor.
“Atyre ua përcjell nga Kosova një porosi: qëndroni të fortë, Kosova është me ju. Fjala e fundit juridike nuk është thënë. E drejta e ankimit është pjesë e procesit dhe duhet të ushtrohet plotësisht”, ka thënë Haxhiu.
Haxhiu ka mbrojtur gjithashtu karakterin çlirimtar të luftës së UÇK-së.
“Lufta e Ushtrisë Çlirimtare të Kosovës ishte çlirimtare. Ajo lindi përballë shtypjes, dhunës dhe krimeve të regjimit të Serbisë ndaj popullit të Kosovës. Asnjë aktgjykim nuk mund ta ndryshojë natyrën e asaj lufte dhe as të zhbëjë të drejtën e një populli për të luftuar për lirinë e vet”, ka shkruar ajo.
Në reagimin e saj, Haxhiu ka thënë se respekti për drejtësinë nuk duhet të nënkuptojë heshtje ndaj përpjekjeve për, siç shprehet ajo, “ta shtrembëruar historinë”.
“Këtë qartësi e presim edhe nga miqtë dhe aleatët tanë”, ka deklaruar ajo.
Në fund, Haxhiu ka bërë thirrje për qetësi, dinjitet dhe bashkim.
“Sot na duhet qetësi, dinjitet dhe bashkim. Dhimbja e kësaj dite nuk duhet të na ndajë”, ka shkruar ajo.
Ajo e ka përmbyllur reagimin me mesazhin se Kosova do ta përballojë edhe këtë situatë duke i qëndruar, sipas saj, besnike drejtësisë, lirisë dhe së vërtetës së saj.
“Sepse aktgjykimet nuk mund ta gjykojnë historinë e një populli as nuk mund ta rishkruajnë atë”, ka përfunduar Haxhiu.
