Interi do të përballet sot në transfertë me Barcelonën në një sfidë gjysmëfinale të shumëpritur në Ligën e Kampionëve. Pavarësisht një jave jo të mirë për skuadrën zikaltër, trajneri Simone Inzaghi shfaqet optimist dhe i vendosur për të mos lënë që rezultatet e fundit të zbehin rrugëtimin e tij katërvjeçar me klubin.
“Në këto katër vite kemi bërë gjëra madhështore. Java e fundit nuk e fshin dot punën e madhe që kemi bërë. Edhe pse në tri ndeshjet e fundit nuk arritëm më të mirën, jemi ende në garë për objektiva të mëdhenj”, deklaroi Inzaghi në konferencën për shtyp para ndeshjes.
Trajneri italian nënvizoi gjithashtu rëndësinë e përballjes me një klub të kalibrit të Barcelonës, duke e quajtur atë një nga ekipet më të organizuara dhe të kompletuara në botë. “Është një ndeshje shumë e rëndësishme dhe ne kemi entuziazëm të madh. Barça është ndoshta skuadra më e mirë në botë, por ne kemi respekt, jo frikë,” tha ai.
Situata në skuadër dhe opsionet për formacionin
Lidhur me gjendjen e skuadrës, Inzaghi konfirmoi se sulmuesi Turam është kthyer në stërvitje me ekipin dhe ka dhënë sinjale pozitive, por mbetet për t’u parë nëse do të jetë gati për të nisur nga minuta e parë. Në rast mungese të tij, alternativa janë Taremi dhe Arnautoviç.
Në mbrojtje, Pavar nuk do të jetë i gatshëm, ndërsa trajneri mund të zgjedhë mes Bisekut, Darmianit dhe De Vrij për të mbushur boshllëkun. Ai shtoi se edhe Dimarko është rikuperuar dhe është në formë për të luajtur nga fillimi.
Ambiciet dhe sfida me dëmtimet
Inzaghi pranoi se dëmtimet kanë qenë një problem për Interin në këtë periudhë, por theksoi se skuadra është në formë të mirë fizike, sidomos pas paraqitjes kundër Bayernit. “Kemi kaluar 7 ditë nga ajo ndeshje ku fiziku ynë ishte në nivel të lartë. Tani, ambicia jonë është që të jemi gjithmonë në nivelet më të larta,” u shpreh ai.
Sipas trajnerit zikaltër, edhe pse kampionati nuk varet më nga Interi, në Champions League skuadra është mes katër më të mirave të kontinentit dhe e meriton plotësisht këtë status. “E kemi nisur këtë rrugëtim që nga shtatori dhe kemi dhënë gjithçka. Jemi të fokusuar dhe të gatshëm për këtë sfidë të madhe,” përfundoi Inzaghi.
