Inspektorati Policor i Kosovës (IPK) ka rekomanduar suspendimin e pesë zyrtarëve policorë, tre në Prishtinë dhe dy në Gjilan, nën dyshimin për përfshirje në vepra penale. Rastet dyshohet se kanë ndodhur më 15 tetor, ndërsa hetimet po zhvillohen në koordinim me Prokurorinë e Shtetit.
Sipas njoftimit të IPK-së, tre zyrtarët policorë në Prishtinë dyshohen për veprat penale “Ngacmim seksual” dhe “Kontrollim i kundërligjshëm”.
Dyshime për ngacmim seksual në Prishtinë
Rasti i parë dyshohet të ketë ndodhur pas mesnatës së 15 tetorit, në afërsi të rrethrrotullimit në lagjen “Lakërishte”.
Sipas pretendimeve të ankueses, ajo ishte duke drejtuar veturën kur ishte ndaluar dhe kontrolluar nga zyrtarët policorë. Më pas, sipas saj, policët i kishin kërkuar të vazhdonte në drejtim të fshatit Çagllavicë, me qëllim të kryerjes së veprimeve me karakter seksual.
Me udhëzim të prokurorit të Prokurorisë Themelore në Prishtinë, është iniciuar procedurë penale lidhur me veprat e dyshuara.
IPK-ja ka bërë të ditur se hetimet do të vazhdojnë në koordinim me Prokurorinë e Shtetit, me qëllim të sqarimit të plotë të rrethanave të rastit.
Dy policë në Gjilan dyshohen për keqpërdorim të detyrës zyrtare
Ndërkaq, në Gjilan, IPK-ja ka rekomanduar suspendimin e dy zyrtarëve policorë, të dyshuar për veprën penale “Keqpërdorimi i pozitës apo autoritetit zyrtar”.
Sipas të dhënave fillestare të hetimit, më 15 tetor, rreth orës 23:00, zyrtarët policorë dyshohet se kanë ndaluar një qytetar dhe e kanë futur në veturën zyrtare.
Gjatë këtij veprimi, pretendohet se ndaj qytetarit është ushtruar abuzim verbal dhe i është cenuar privatësia. Po ashtu, dyshohet se atij i është marrë telefoni pa urdhër të Prokurorisë së Shtetit.
Dyshimet fillestare sugjerojnë se ky rast mund të lidhet me një ankesë që i njëjti qytetar kishte parashtruar në korrik të këtij viti ndaj zyrtarëve policorë, për keqtrajtim dhe tejkalim të autorizimeve policore.
IPK-ja vazhdon hetimet
Inspektorati Policor i Kosovës ka bërë të ditur se do të vazhdojë hetimin e dyshimeve për veprime të kundërligjshme nga zyrtarët policorë, me synim të zbardhjes së plotë të rasteve dhe garantimit të llogaridhënies.
Rekomandimi për suspendim është masë procedurale dhe nuk nënkupton se zyrtarët e përfshirë janë shpallur fajtorë. Përgjegjësia penale përcaktohet nga organet kompetente në përfundim të procedurave ligjore.