Gjykata Themelore në Prishtinë, edhe pas rigjykimit, e ka shpallur fajtor Shaqir Lutvijën dhe e ka dënuar me 10 vjet burgim për akuzën për krime lufte në Prizren.
Aktgjykimi u shpall të martën nga trupi gjykues i kryesuar nga gjyqtari Kujtim Krasniqi, me anëtarët Violeta Namani-Hajra dhe Rrahman Beqiri.
Gjykata ka bërë të ditur se në dënimin me burgim do t’i llogaritet edhe koha e kaluar në paraburgim, ndërsa kjo masë do të vazhdojë deri në plotfuqishmërinë e aktgjykimit, por jo më gjatë se dënimi i shqiptuar.
Lutvija është obliguar të paguajë edhe shpenzimet e procedurës penale, përkatësisht 400 euro për paushallin gjyqësor dhe 100 euro për Fondin për Kompensimin e Viktimave të Krimit.
Palët kanë të drejtë ankese ndaj këtij vendimi brenda 30 ditësh përmes Gjykatës Themelore në Prishtinë, në Gjykatën e Apelit.
Sipas aktakuzës së ngritur nga Prokuroria Speciale e Republikës së Kosovës, Lutvija akuzohej se gjatë periudhës 1998-1999, në cilësinë e inspektorit dhe policit në Stacionin Policor në Prizren, në bashkëkryerje me pjesëtarë të tjerë të forcave policore serbe, ka marrë pjesë në veprime represive ndaj popullatës civile shqiptare.
Ai akuzohej për vrasje, arrestime, rrahje, maltretime dhe trajtim çnjerëzor të të arrestuarve gjatë luftës në Kosovë.
Gjykata Themelore kishte shpallur edhe më herët aktgjykim dënues ndaj Lutvijës me 10 vjet burgim, por Gjykata e Apelit e kishte kthyer rastin në rigjykim.
Lutvija gjatë seancës fillestare ishte deklaruar i pafajshëm për akuzat që i viheshin në barrë.
