Ish-ministri i Jashtëm i Gjermanisë, Joschka Fischer, ka shprehur skepticizëm të fortë mbi të ardhmen e NATO, duke paralajmëruar se aleanca mund të mos vazhdojë të ekzistojë në formën e saj aktuale transatlantike.
Në një intervistë për Der Spiegel, Fischer kritikoi ashpër politikat e Donald Trump, veçanërisht qasjen ndaj Iranit, të cilën e cilësoi të pasuksesshme dhe kontribuese në forcimin e elementeve radikale në Teheran.
Sipas tij, besimi i Evropës tek Shtetet e Bashkuara të Amerikës si garant i sigurisë është dëmtuar rëndë dhe nuk mund të rikthehet lehtë, pavarësisht se kush është në Shtëpinë e Bardhë.
“Dyshoj se NATO mund të vazhdojë të ekzistojë si një aleancë transatlantike. Në të ardhmen, Evropa nuk do të mund të mbështetet më te SHBA-ja”, u shpreh Fischer.
Ai theksoi se Evropa duhet të forcojë kapacitetet e saj ushtarake dhe të ndërtojë një arkitekturë më të pavarur sigurie, ku rol kyç do të kenë vende si Gjermania dhe Franca.
Fischer gjithashtu mbështeti vendimin e kancelarit Friedrich Merz për të mos u përfshirë në luftën kundër Iranit, duke e cilësuar atë si një vendim të mençur në rrethanat aktuale.
Në intervistë, ai rikujtoi edhe rolin e tij në vitin 1999 gjatë ndërhyrjes së NATO-s në Kosova, duke e cilësuar atë si një domosdoshmëri historike për të parandaluar një gjenocid të ri në Evropë, në kohën e regjimit të Slobodan Milošević.
Deklaratat e Fischer vijnë në një moment tensionesh të rritura globale dhe debatesh të forta mbi të ardhmen e sigurisë evropiane dhe rolin e SHBA-së në kontinent.
