Presidenti i Shtetet e Bashkuara të Amerikës, Donald Trump, ka kërcënuar se mund të tërheqë trupat amerikane nga Spanja dhe Italia, duke thelluar përplasjet me aleatët evropianë të NATO.
Duke folur nga Zyra Ovale, Trump kritikoi ashpër kryeministrin spanjoll Pedro Sánchez dhe homologen italiane Giorgia Meloni, duke i akuzuar se nuk kanë mbështetur operacionet amerikane në luftën kundër Iranit.
Ai deklaroi se Italia “nuk ka ndihmuar aspak”, ndërsa Spanjën e cilësoi si “absolutisht të tmerrshme”, pasi të dyja vendet kanë refuzuar përdorimin e bazave të tyre nga avionët amerikanë të përfshirë në konflikt.
Këto deklarata vijnë vetëm pak ditë pas kërcënimeve të ngjashme ndaj kancelarit gjerman Friedrich Merz, duke reflektuar tensionet në rritje mes SHBA-së dhe aleatëve evropianë.
Ministri italian i Mbrojtjes, Guido Crosetto, reagoi duke thënë se nuk e kupton arsyen e një tërheqjeje të mundshme të trupave amerikane nga Italia.
Aktualisht, SHBA ka rreth 12,000 trupa të stacionuar në Itali dhe rreth 3,800 në Spanjë, ndërsa prania më e madhe mbetet në Gjermani me mbi 36,000 ushtarë.
Ekspertët paralajmërojnë se çdo tërheqje e mundshme e trupave amerikane do të kishte pasoja të mëdha strategjike, duke dobësuar pozicionin ushtarak të SHBA-së në Evropë dhe duke vënë në pikëpyetje stabilitetin e aleancës transatlantike.
Megjithatë, zyrtarë të mbrojtjes kanë bërë të ditur se aktualisht nuk ka plane konkrete për tërheqje, edhe pse deklaratat e Trump po merren seriozisht në qarqet politike dhe ushtarake.
