Kompania për Distribuimin e Energjisë Elektrike në Kosovë (KEDS) ka bërë të ditur se të hënën, më 20 prill 2026, do të ketë ndërprerje të planifikuara të energjisë elektrike në disa rajone të vendit për shkak të punimeve në rrjet.
Sipas njoftimit, punimet do të realizohen për mirëmbajtje preventive, eliminim të defekteve dhe projekte investive, duke prekur zona të ndryshme në Prishtinë, Pejë, Prizren, Ferizaj dhe Gjakovë.
Në rajonin e Prishtinës, ndërprerjet do të ndodhin në disa fshatra si Keqekolla, Prapashtica dhe Hajkobilla nga ora 10:00 deri në 15:00, ndërsa në zona të tjera si Mazgiti dhe rrethinat, ndërprerjet do të zgjasin nga ora 09:00 deri në 14:00.
Në Pejë, një numër i madh rrugësh dhe fshatrash do të mbesin pa energji përkohësisht nga ora 09:00 deri në 10:30, si dhe në zona të tjera deri në orën 15:30, për shkak të pastrimit të rrjetit dhe punimeve teknike.
Ndërprerje do të ketë edhe në Prizren, konkretisht në fshatrat Grazhdanik, Kobajë, Nashec dhe Vlashnjë nga ora 10:00 deri në 15:00.
Në rajonin e Ferizajt dhe Kaçanikut, disa zona do të përballen me ndërprerje nga ora 10:30 deri në 15:00, ndërsa në Gjakovë ndërprerjet do të ndodhin në lagjen Brekoc dhe disa fshatra përreth nga ora 10:00 deri në 15:00.
KEDS apelon te qytetarët për mirëkuptim gjatë kohës së realizimit të punimeve, duke theksuar se këto ndërhyrje janë të domosdoshme për rritjen e sigurisë dhe stabilitetit të sistemit energjetik.
