KEDS ka njoftuar se të martën, më 21 prill 2026, do të realizohen punime në rrjet për sigurinë dhe mirëmbajtjen e sistemit energjetik, duke shkaktuar ndërprerje të përkohshme të energjisë elektrike në disa zona të vendit.
Sipas njoftimit, ndërprerjet do të prekin disa rajone kryesore, përfshirë Prishtina, Peja, Prizreni, Mitrovica dhe Gjilani.
Në Prishtinë, ndërprerje do të ketë në zona si rruga Muharrem Fejza, Dardhishtë, Bardhosh, Bërnicë, Trudë dhe Sharban, me orare që variojnë nga 09:00 deri në 18:00, varësisht nga lokacioni dhe lloji i punimeve.
Në rajonin e Pejës, energjia do të ndërpritet nga ora 10:00 deri në 15:00 në disa fshatra, përfshirë Vitomiricën, Brestovikun dhe Jabllanicën, për shkak të mirëmbajtjes preventive.
Ndërkaq, në Prizren, ndërprerjet do të jenë më të gjera, duke përfshirë një numër të madh fshatrash dhe zonash urbane në intervalin 10:30–15:30, si dhe disa zona të qytetit nga ora 09:00 deri në 12:00.
Në Mitrovicë, konkretisht në rajonin e Vushtrrisë, ndërprerjet do të zgjasin nga ora 10:00 deri në 15:00, ndërsa në Gjilan, zona e Kamenicës dhe disa fshatra përreth do të mbeten pa energji në të njëjtin interval kohor.
KEDS thekson se këto ndërprerje janë të planifikuara dhe kanë për qëllim përmirësimin e rrjetit, eliminimin e defekteve dhe rritjen e sigurisë së furnizimit me energji elektrike.
