Kina ka njoftuar se ka arritur një marrëveshje paraprake me Shtetet e Bashkuara për uljen e disa tarifave doganore, në një sinjal të ri për zbutjen e tensioneve tregtare mes dy ekonomive më të mëdha në botë.
Ministria kineze e Tregtisë bëri të ditur se Pekini dhe Uashingtoni kanë rënë dakord në parim për të promovuar tregtinë dypalëshe, përfshirë edhe produktet bujqësore, përmes uljeve reciproke të tarifave për një sërë produktesh.
“Të dyja palët ranë dakord të promovojnë tregtinë dypalëshe, duke përfshirë produktet bujqësore, përmes marrëveshjeve si uljet e ndërsjella të tarifave për një gamë produktesh”, thuhet në deklaratën e ministrisë kineze.
Sipas Pekinit, do të krijohen gjithashtu një këshill tregtar dhe një këshill investimesh, që do të negociojnë jo vetëm tarifat për produkte specifike, por edhe reduktime më të gjera të barrierave tregtare.
Në deklaratë thuhet se dy vendet do të punojnë edhe për heqjen e barrierave jotarifore dhe për përmirësimin e aksesit në treg, sidomos në sektorin bujqësor.
Një tjetër pikë e rëndësishme e marrëveshjes lidhet me aviacionin civil, ku Kina dhe SHBA kanë konfirmuar marrëveshje për blerjen e avionëve amerikanë dhe furnizimin me motorë e pjesë këmbimi.
Presidenti amerikan Donald Trump kishte deklaruar më herët se Kina kishte rënë dakord të blejë 200 avionë Boeing, si dhe motorë nga General Electric.
Megjithatë, interesant mbetet fakti se vetë Trump kishte deklaruar pas takimit me presidentin kinez Xi Jinping se çështja e tarifave nuk ishte diskutuar drejtpërdrejt gjatë samitit në Pekin.
Takimi i radhës mes dy liderëve pritet të zhvillohet në shtator, kur Xi Jinping do të zhvillojë një vizitë shtetërore në Shtëpinë e Bardhë.
