Alex Saab, biznesmeni kolumbiano-venezuelian i njohur si “arkëtari” i ish-presidentit venezuelian Nicolás Maduro, është ekstraduar në Shtetet e Bashkuara, në një zhvillim që mund të tronditë skenën politike në Venezuelë dhe të hapë kapitull të ri në hetimet amerikane për korrupsion dhe trafik droge.
Qeveria venezueliane konfirmoi se Saab është “deportuar”, pa dhënë detaje për destinacionin e tij, por raportimet tregojnë se ai tashmë ndodhet në territorin amerikan, ku mund të përballet me drejtësinë federale.
Saab, 54 vjeç, kishte ndërtuar një pasuri marramendëse që vlerësohet deri në 3 miliardë dollarë, kryesisht përmes kontratave me shtetin venezuelian. Për vite me radhë ai konsiderohej një nga njerëzit më të afërt të Maduros dhe ndërmjetësi kryesor për marrëveshje ndërkombëtare.
Sipas raportimeve, administrata amerikane e sheh Saab-in si një dëshmitar potencialisht kyç në çështjet kundër figurave të larta të regjimit venezuelian, përfshirë vetë Maduron.
Mediat ndërkombëtare raportojnë se Saab kishte bashkëpunuar fshehurazi me DEA-n, duke ndihmuar autoritetet amerikane në hetime për korrupsion dhe rrjete financiare të dyshimta pranë pushtetit venezuelian.
Në të kaluarën, ai ishte arrestuar në Cape Verde në vitin 2020, ndërsa më pas u lirua si pjesë e një marrëveshjeje shkëmbimi të të burgosurve gjatë administratës Biden.
Emri i tij është përfshirë edhe në hetime në Itali, ku bashkë me bashkëshorten e tij, Camilla Fabri, pranoi fajësinë për një çështje pastrimi parash lidhur me investime të dyshimta në Romë.
Ekstradimi i Saab pritet të rrisë tensionet brenda elitës politike venezueliane, sidomos nëse ai vendos të bashkëpunojë plotësisht me drejtësinë amerikane.Burimi: Corriere della Serra
