Të paktën tre persona kanë humbur jetën dhe dhjetëra të tjerë janë plagosur pas një sulmi të gjerë me dronë ukrainas ndaj Moskës dhe rajoneve përreth, në një përshkallëzim të ri të konfliktit mes Rusisë dhe Ukrainës.
Sipas autoriteteve ruse, një grua humbi jetën në një banesë në Khimki, në veri të Moskës, ndërsa dy viktima të tjera – një burrë dhe një grua – u raportuan në fshatin Pogorelki.
Guvernatori i rajonit të Moskës, Andrei Vorobiev, tha se sulmet nisën rreth orës 03:00 të mëngjesit dhe se sistemet e mbrojtjes ajrore u angazhuan për të zmbrapsur valën e dronëve.
Ndërkohë, kryebashkiaku i Moskës, Sergei Sobyanin, bëri të ditur se 12 persona u plagosën pas goditjes së një rafinerie nafte në kryeqytet.
Sipas ushtrisë ruse, mbrojtja ajrore ka rrëzuar 556 dronë ukrainas, duke e cilësuar sulmin si një nga më të mëdhenjtë ndaj territorit rus.
Edhe aeroporti Sheremetyevo, më i madhi në Moskë, raportoi mbetje dronësh në territorin e tij, megjithatë operacionet vazhduan pa ndërprerje.
Nga ana tjetër, në Ukrainë, autoritetet raportuan tetë të plagosur pas sulmeve ruse në rajonin e Dnipropetrovskut, ndërsa presidenti Volodymyr Zelensky paralajmëroi kundërpërgjigje të ashpër ndaj Moskës.
“Forcat tona me rreze të gjatë po godasin objektet ruse të naftës dhe asetet strategjike. Shumica e operacioneve janë ende në zhvillim”, deklaroi Zelensky.
Sipas forcave ajrore ukrainase, Rusia ka lëshuar 287 dronë vetëm gjatë natës së fundit, ndërsa lufta që nisi me pushtimin rus në vitin 2022 vazhdon të përshkallëzohet me sulme intensive nga të dyja palët.
