Demokratët në Dhomën e Përfaqësuesve të SHBA kanë hapur një hetim ndaj Jared Kushner, duke ngritur dyshime për konflikte interesi mes aktivitetit të tij financiar dhe rolit të tij si ndërmjetës jozyrtar në politikën e jashtme amerikane.
Hetimi është inicuar nga anëtari i Kongresit Jamie Raskin, i cili i ka dërguar një letër Kushnerit, duke kërkuar sqarime mbi lidhjet e tij me kompaninë e investimeve Affinity Partners dhe ndikimin e mundshëm në vendimmarrjen politike.
Në qendër të shqetësimeve është fondi prej 2 miliardë dollarësh i financuar nga Arabia Saudite, që menaxhohet nga kompania e Kushnerit. Ky fond, sipas raportimeve, pritet të investohet edhe në projekte turistike në ishullin e Sazanit në Shqipëri, me vlerë që mund të arrijë deri në 1 miliard dollarë.
Raskin theksoi se është problematike që një individ të jetë njëkohësisht i përfshirë në diplomaci dhe të menaxhojë investime të lidhura me interesa të huaja strategjike, duke përmendur edhe lidhjet me Mohammed bin Salman.
Sipas tij, ekziston rreziku që interesat e partnerëve financiarë nga Gjiri Persik të bien ndesh me interesat e Shteteve të Bashkuara.
Megjithëse Kushner nuk mban një post zyrtar në administratë, ai ka luajtur rol aktiv në përpjekjet diplomatike, përfshirë ndërmjetësime në konfliktet ndërkombëtare, gjë që e bën edhe më të ndërlikuar çështjen e transparencës dhe përgjegjshmërisë.
Aktualisht, nuk është e qartë nëse Kushner do të bashkëpunojë me hetimin, ndërsa zhvillimet politike pas zgjedhjeve të ardhshme në SHBA mund të ndikojnë në rrjedhën e këtij procesi.