Bullgaria po voton në zgjedhjet parlamentare në një klimë të tensionuar politike, ku favoriti kryesor është ish-presidenti Rumen Radev, i njohur për qëndrimet e tij euroskeptike dhe afërsinë me Rusinë.
Sipas sondazheve, partia e tij “Bullgaria Progresiste” kryeson me rreth 31%, përballë 21% të partisë GERB të ish-kryeministrit Bojko Borisov. Në garë janë edhe forcat europianiste dhe partitë e tjera më të vogla, duke e bërë të paqartë krijimin e një shumice qeverisëse.
Procesi zgjedhor është shoqëruar edhe me incidente, ku janë raportuar 181 denoncime për manipulim votash dhe janë arrestuar tre persona.
Fitorja e mundshme e Radevit ka ngritur shqetësime në qarqet europiane, ku ai shihet si një figurë që mund të ndjekë një linjë të ngjashme me atë të Viktor Orbán në Hungari, duke forcuar sovranizmin dhe duke sfiduar politikat e Bashkimit Evropian.
Radev ka kundërshtuar mbështetjen e fortë ndaj Ukrainës dhe ka shprehur qëndrime pragmatike ndaj Rusisë, përfshirë edhe mbështetjen për importin e naftës ruse dhe skepticizmin ndaj politikave të BE-së si Green Deal.
Në të kaluarën, ai është përplasur publikisht edhe me presidentin ukrainas Volodymyr Zelensky për çështjen e luftës në Ukrainë.
Megjithatë, edhe në rast fitoreje, mbetet e paqartë se me kë do të formojë qeverinë, pasi skena politike bullgare është thellësisht e fragmentuar dhe vendi ka kaluar në zgjedhje të shpeshta gjatë viteve të fundit.
Analistët paralajmërojnë se sfida e vërtetë për Radevin nuk do të jetë vetëm fitorja, por aftësia për të ndërtuar një koalicion funksional dhe për të shmangur një tjetër krizë politike në vend.
