Kosova dhe Shqipëria po lëvizin drejt një lehtësimi të mëtejshëm të tregtisë së produkteve ushqimore, pas një takimi mes drejtuesve të autoriteteve përkatëse të sigurisë ushqimore të dy vendeve.
Agjencia e Ushqimit dhe Veterinarisë e Kosovës (AUV) njoftoi se drejtori ekzekutiv, Bekim Hoxha, ka pritur në takim drejtoreshën e përgjithshme të Autoritetit Kombëtar të Ushqimit të Shqipërisë (AKU), Blerina Gjylameti, ku në fokus ishte reduktimi i barrierave administrative dhe harmonizimi i procedurave sipas praktikave të Bashkimit Evropian.
Sipas komunikatës, palët janë dakorduar për përditësimin e certifikatave tregtare sipas modeleve më të fundit të BE-së, koordinimin në procedurat e gjurmimit dhe trajtimit të njoftimeve në sistemin RASFF, si dhe njoftimin reciprok paraprak për produktet që rieksportohen mes dy vendeve.
Po ashtu, pjesë e diskutimeve ishte edhe bashkëpunimi në ngritjen e kapaciteteve laboratorike dhe njohja reciproke e rezultateve të analizave.
Drejtori i AUV-së, Bekim Hoxha, tha se Kosova ka avancuar ndjeshëm në digjitalizimin e shërbimeve dhe kontrolleve.
“Aktualisht kemi arritur rreth 90 për qind të digjitalizimit, duke ndjekur modelet e vendeve anëtare të Bashkimit Evropian”, theksoi ai.
Nga ana tjetër, drejtoresha e AKU-së, Blerina Gjylameti, prezantoi reformat që po zhvillohen në Shqipëri në kuadër të procesit të integrimit evropian, veçanërisht në përmbushjen e Kapitullit 12, që lidhet me sigurinë ushqimore.
Ajo bëri të ditur se Shqipëria po punon në forcimin e kapaciteteve laboratorike, reformimin e trupave inspektuese dhe rritjen e standardeve të kontrollit në gjithë zinxhirin ushqimor, nga prodhimi deri te konsumatori.
Në nivel teknik, ekspertët diskutuan edhe harmonizimin e certifikatave ekzistuese dhe procedurat e reja të kontrollit, ndërsa u theksua se Kosova do të mbështesë Shqipërinë në fushat ku ka përparësi në zbatimin e standardeve të BE-së, ndërsa Shqipëria pritet të shërbejë si vend referencë për Kosovën në fazat e ardhshme të integrimit evropian.
