Komisioni Qendror i Zgjedhjeve (KQZ) ka certifikuar zyrtarisht Listën Votuese për zgjedhjet e parakohshme parlamentare që do të mbahen më 7 qershor në Kosovë. Sipas të dhënave të publikuara, në këtë proces zgjedhor të drejtë vote kanë 2,092,174 qytetarë.
Numri i votuesve është rritur krahasuar me zgjedhjet e fundit parlamentare të mbajtura më 28 dhjetor 2025, me gjithsej 15,884 votues më shumë në listë.
Nga numri i përgjithshëm, 1,959,962 qytetarë do të votojnë në vendvotimet brenda Kosovës, ndërsa 132,212 qytetarë janë regjistruar për të votuar nga diaspora.
Sipas KQZ-së, nga votuesit jashtë vendit, 100,970 persona janë regjistruar për të votuar përmes postës në adresat e tyre jashtë Kosovës, 3,518 përmes kutive postare në Kosovë dhe 27,724 do të votojnë fizikisht në përfaqësitë diplomatike.
Në zgjedhjet e 7 qershorit do të marrin pjesë edhe mijëra votues të rinj. Sipas raportit të KQZ-së, 22,685 qytetarë do të votojnë për herë të parë. Prej tyre, 16,934 kanë mbushur moshën 18-vjeçare pas zgjedhjeve të fundit, ndërsa pjesa tjetër përfshin qytetarë të regjistruar rishtazi ose persona që kanë rikthyer shtetësinë e Kosovës.
Ndërkohë, nga lista votuese janë larguar 6,801 persona, përfshirë qytetarë të evidentuar si të vdekur, persona që kanë humbur shtetësinë dhe raste të tjera administrative.
KQZ ka bërë të ditur gjithashtu se procesi zgjedhor në Kosovë do të zhvillohet në 949 qendra votimi me gjithsej 2,550 vendvotime. Ndërsa për votuesit jashtë vendit, procesi do të organizohet në 30 përfaqësi diplomatike, përfshirë ambasada dhe konsullata, ku votimi fizik do të mbahet më 6 qershor.
