Komisioni Qendror i Zgjedhjeve ka nisur sot disa faza kyçe të procesit zgjedhor për zgjedhjet e 7 qershorit 2026, të cilat lidhen drejtpërdrejt me votuesit brenda dhe jashtë vendit.
Nga 6 deri më 17 maj, qytetarët e Kosovës që jetojnë jashtë vendit mund të regjistrohen si votues të diasporës dhe të zgjedhin mënyrën e votimit: fizikisht në përfaqësi diplomatike, përmes postës jashtë vendit apo duke dërguar votën në Kosovë. Sipas zëdhënësit të KQZ-së, Valmir Elezi, aplikimi bëhet përmes platformës elektronike zyrtare të KQZ-së.
Në të njëjtën periudhë (6–17 maj), votuesit brenda vendit kanë mundësi të ndryshojnë qendrën e votimit brenda komunës së tyre, ndërsa deri më 18 maj është i hapur afati për kundërshtimin e pasaktësive në listën votuese.
KQZ ka vendosur që votimi jashtë Kosovës të organizohet në 48 përfaqësi diplomatike, përkatësisht në 33 ambasada dhe 15 konsullata, me gjithsej 70 vendvotime. Numri maksimal i votuesve që mund të regjistrohen për votim fizik në këto përfaqësi është 66,450, ndërsa votimi përmes postës mbetet pa kufizim.
Sipas rregullave të reja, nëse në një përfaqësi diplomatike regjistrohen më pak se 50 votues, votimi fizik nuk do të organizohet dhe ata do të kalojnë automatikisht në votim përmes postës.
Po ashtu, qytetarët që konstatojnë pasaktësi në listën votuese – si mungesë emri, vendosje në qendër të gabuar apo edhe përfshirje të personave të vdekur – mund të paraqesin kërkesë për korrigjim përmes platformës online ose pranë komisioneve komunale të zgjedhjeve, ndërsa ankesat formale trajtohen nga Paneli Zgjedhor për Ankesa dhe Parashtresa.
Me këto hapa, KQZ synon të rrisë transparencën dhe përfshirjen e votuesve në një nga proceset më të rëndësishme demokratike në vend.
