Kryeministri në detyrë i Kosovës, Albin Kurti, ka marrë pjesë në Forumin e Agrobiznesit Itali-Kosovë, i mbajtur në Prishtinë, ku janë bërë bashkë institucione, kompani dhe sipërmarrës nga të dy vendet me synimin për krijimin e partneriteteve konkrete dhe afatgjata në sektorin ekonomik.
Në fjalën e tij, Kurti e cilësoi Italinë si një nga partnerët më të rëndësishëm të Kosovës, jo vetëm në ekonomi, por edhe në diplomaci, siguri dhe mbështetje për zhvillimin e vendit.
“Marrëdhëniet tona janë të forta dhe tani është koha që ato të thellohen edhe më shumë në dimensionin ekonomik dhe prodhues”, deklaroi ai.
Kurti theksoi se zhvillimi ekonomik nuk ndërtohet vetëm mbi kapitalin, por mbi partneritete reale, shkëmbim përvojash dhe lidhje direkte mes bizneseve, duke e vlerësuar forumin si një mundësi të rëndësishme për zgjerimin e bashkëpunimit.
Ai tha se gjatë viteve të fundit, Kosova ka shënuar rritje të eksporteve, përmirësim të klimës së të bërit biznes dhe tërheqje të investimeve të reja, ndërsa shtoi se vendi mbetet i hapur për investitorët dhe partneritetet serioze ekonomike.
Sipas Kurtit, bashkëpunimi mes Kosovës dhe Italisë nuk duhet të kufizohet vetëm në agro-industri, por të zgjerohet edhe në sektorë të tjerë strategjikë të zhvillimit ekonomik.
