Kryeministri i Kosovës dhe kryetari i Lëvizjes Vetëvendosje, Albin Kurti, ka vlerësuar rezultatin e Koalicionit Shqiptar në zgjedhjet parlamentare në Serbi, duke bërë të ditur se ky koalicion ka siguruar 27.670 vota dhe dy mandate në Kuvendin e Serbisë.
Kurti i ka bërë këto deklarata në mbledhjen e 64-t të Këshillit të Përgjithshëm të Lëvizjes Vetëvendosje, ku ka folur edhe për zhvillimet politike në Serbi dhe përfaqësimin e shqiptarëve në Luginën e Preshevës.
Sipas tij, Koalicioni Shqiptar ka marrë 1.233 vota më shumë se në zgjedhjet e vitit 2020, duke shënuar rezultatin më të lartë të shqiptarëve në Serbi që nga viti 2000.
Kurti vlerëson bashkimin e subjekteve politike shqiptare
Kryeministri ka thënë se ky rezultat është arritur falë bashkimit të subjekteve politike shqiptare, të cilat, sipas tij, kanë vendosur interesin e përgjithshëm mbi atë partiak.
Ai ka theksuar se shqiptarët, ndonëse përbëjnë pakicën e katërt kombëtare për nga popullsia në Serbi, janë renditur të dytët për nga numri i votave dhe, së bashku me hungarezët, të parët për nga mandatet ndër nëntë listat e pakicave kombëtare.
Kurti ka falënderuar drejtuesit e subjekteve politike, kandidatët, aktivistët dhe qytetarët që kontribuuan në këtë rezultat.
Kurti: Skena politike në Serbi po rikonfigurohet
Duke komentuar rezultatet e përgjithshme të zgjedhjeve, Kurti ka deklaruar se ato kanë sjellë ndryshime në skenën politike të Serbisë.
Sipas tij, Lista Studentore ka dalë e para, koalicioni i Aleksandar Vuçiqit ka humbur shumicën parlamentare, ndërsa lista e Ivica Daçiqit ka mbetur jashtë Kuvendit.
“Ne e dimë kush e ka humbur pushtetin në Serbi, por ende nuk e dimë kush e ka fituar atë”, ka deklaruar Kurti.
Ai ka shprehur shpresën që ndryshimet politike në Serbi të shoqërohen edhe me një qasje tjetër të Beogradit ndaj Kosovës dhe shqiptarëve në Preshevë, Bujanoc e Medvegjë.
Kërkon ballafaqim me të kaluarën dhe zbardhjen e krimeve
Në fjalën e tij, Kurti ka përmendur edhe nevojën për ballafaqim me të kaluarën, demokratizim të institucioneve dhe dekriminalizim institucional në Serbi, duke i cilësuar këto si kushte për normalizimin e marrëdhënieve me vendet fqinje.
Ai ka theksuar gjithashtu se zbardhja e krimeve të kryera ndaj civilëve shqiptarë, identifikimi i varrezave masive dhe ndriçimi i fatit të personave të zhdukur mbeten detyrime ndaj viktimave dhe familjeve të tyre.
“Pa të vërtetën për të kaluarën, nuk mund të ndërtohet besimi për të ardhmen”, ka thënë Kurti.
Në përfundim, ai ka deklaruar se Kosova synon marrëdhënie të mira fqinjësore me Serbinë, të bazuara në barazi dhe respekt të ndërsjellë, duke theksuar se normalizimi i plotë i marrëdhënieve duhet të përfundojë me njohje të ndërsjellë.
