Albin Kurti mori pjesë në tryezën e organizuar në shënim të 14 Prillit – Ditës Memoriale të të Mbijetuarve të Dhunës Seksuale nga lufta e fundit në Kosovë, duke theksuar rëndësinë e kujtesës, drejtësisë dhe mbështetjes institucionale për viktimat.
Në fjalën e tij, Kurti u shpreh se kjo ditë përfaqëson një moment reflektimi dhe përgjegjësie, ku nderohen të gjithë ata që përjetuan dhunë seksuale gjatë luftës – një nga plagët më të rënda dhe më të heshtura të shoqërisë kosovare.
Ai theksoi se për shumë vite kjo dhimbje ka mbetur e fshehur për shkak të frikës, stigmatizimit dhe mungesës së hapësirës për të folur, duke shtuar se institucionet e Kosovës janë të përkushtuara që kjo të mos ndodhë më.
Kryeministri vuri në pah rolin e Komisionit Qeveritar për Njohjen dhe Verifikimin e Statusit, i cili sipas tij garanton që çdo i mbijetuar të dëgjohet dhe të trajtohet me dinjitet. Deri më tani, sipas të dhënave zyrtare, janë njohur 1,925 raste të personave të mbijetuar.
Kurti theksoi se ende ka shumë persona që jetojnë në heshtje dhe hezitojnë të kërkojnë të drejtat e tyre, duke bërë thirrje për rritjen e angazhimit institucional dhe shoqëror për t’i mbështetur ata.
Ai shtoi se rrëfimet e të mbijetuarve dëshmojnë nevojën për kujdes shoqëror dhe drejtësi shtetërore, duke theksuar se mbështetja ndaj tyre është detyrë e përbashkët dhe kërkon përkushtim të vazhdueshëm.
Në fund, Kurti nënvizoi se proceset e drejtësisë tranzicionale dhe dokumentimi i krimeve të luftës janë thelbësore për ndërtimin e një të ardhmeje më të drejtë, duke shtuar se institucionet do të vazhdojnë të punojnë për të forcuar besimin dhe për të afruar shërbimet pranë qytetarëve.
14 Prilli në Kosovë shënohet si ditë përkujtimore për të gjithë të mbijetuarit e dhunës seksuale gjatë luftës, duke synuar rritjen e ndërgjegjësimit dhe mbështetjes për ta.
